პოლიტიკა

ახალ მთავრობაში აღარ მიხილავთ - სოზარ სუბარი

ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მოქმედმა მინისტრმა სოზარ სუბარმა განაცხადა, რომ ის მთავრობის ახალ შემადგენლობაში აღარ იქნება.

„ჩემს გეგმებთან დაკავშირებით მოგვიანებით გაიგებთ. ერთადერთი პასუხი, რაც შემიძლია დანამდვილებით გითხრათ, ეს არის, რომ – არა. ახალ მთავრობაში ვერ მიხილავთ“, – განაცხადა სუბარმა.

მისი თქმით, სტრუქტურული ცვლილებების შემდეგ, მისი უწყების ფუნქციების დელეგირება სხვადასხვა სამინისტროზე ადეკვატურად მოხდება. სუბარმა აღნიშნა, რომ არსებულ ვითარებაში მცირე მთავრობის შექმნა აუცილებელი და საჭიროა.

სტრუქტურული ცვლილებების მიხედვით, ოკუპირებული ტერიტორიებიდან იძულებით გადაადგილებულ პირთა, დევნილთა და განსახლების სამინისტრო უქმდება და მისი ფუნქცია სამ სხვადასხვა უწყებაზე გადანაწილდება. დევნილთათვის განსახლების ფუნქცია გადავა ინფრასტრუქტურის სამინისტროში, მიგრაციას შსს შეითავსებს, სოციალურ პოლიტიკას – ჯანდაცვის სამინისტრო.