პოლიტიკა

აგრარულ საკითხთა კომიტეტმა სარატიფიკაციოდ წარმოდგენილ დოკუმენტს მხარი დაუჭირა

კომიტეტის დღევანდელ სხდომაზე მთავრობის მიერ რატიფიცირებისათვის წარმოდგენილი „ამერიკის შეერთებულ შტატებსა და საქართველოს შორის 2015 წლის 22 დეკემბრით დათარიღებული „ინკლუზიური და მდგრადი ეკონომიკური ზრდა“ განვითარების მიზნის შესახებ საგრანტო შეთანხმებაში“ ცვლილება ნომერი ერთი“ განიხილეს.

საკითხი სხდომაზე ფინანსთა მინისტრის მოადგილემ გიორგი კაკაურიძემ გამოიტანა და კანონმდებლებს შეთანხმებაში განსახორციელებელი ცვლილების თაობაზე ინფორმაცია მიაწოდა.

როგორც სხდომაზე აღინიშნა, პროექტის - „ინკლუზიური და მდგრადი ეკონომიკური ზრდა“ მიზანია ეკონომიკური მართვისა და ხელმძღვანელობის გაუმჯობესება, გლობალური ბიზნეს სტანდარტების საყოველთაო დანერგვა, სამიზნე სექტორებში კონკურენტუნარიანობის გაზრდა, საქართველოს ბუნებრივი რესურსების ეფექტურად მართვა და მაღალი კომპეტენციის, ბაზარზე ორიენტირებული სამუშაო ადგილების შექმნა.

საქართველოს პარლამენტის ინფორმაციით, საგრანტო შეთანხმების ცვლილების მიხედვით, იგეგმება USAID-ის მიერ გამოყოფილი ჯამური თანხის 13,1 მლნ აშშ დოლარით გაზრდა, რაც შესაბამისად, 57,298,636 აშშ დოლარს მიაღწევს. ასევე იზრდება საგრანტო თანხის ოდენობაც - 14 მლნ 970 ათასი აშშ დოლარით. პროექტის ფარგლებში განსახორციელებელი მიმართულებები რჩება იგივე, რაც ძირითადი საგრანტო შეთანხმებით იყო განსაზღვრული. ამ პროექტის ფარგლებში დაგეგმილია აქტივობები შემდეგი მიმართულებებით: კონფლიქტების შემსუბუქება და შერიგება; განათლება; ინფრასტრუქტურა; სოფლის მეურნეობა; კერძო სექტორის კონკურენტუნარიანობა და გარემო. შესაბამისად, ყველა მათგანისათვის გამოყოფილი თანხების ოდენობა იზრდება. მომხსენებლის განცხადებით, მათ შორის, სოფლის მეურნეობის მიმართულებით განსახორციელებელი აქტივობებისათვის განსაზღვრული საგრანტო თანხა გაიზარდა ერთი მილიონ 700 ათასი აშშ დოლარის ოდენობით და 3 მლნ 260 ათასი აშშ დოლარი შეადგინა.

კომიტეტის წევრებმა საკითხს ერთხმად დაუჭირეს მხარი.

ამავე სხდომაზე, კომიტეტის წევრებმა ასევე განიხილეს და ერთხმად დაამტკიცეს აგრარულ საკითხთა კომიტეტის 2017 წლის საგაზაფხულო სესიის საზედამხედველო საქმიანობის გეგმა, რომელიც სოფლის მეურნეობის სხვადასხვა მიმართულებით განხორციელებული ღონისძიებებისა და აქტივობების შესახებ ინფორმაციების მოსმენას და შესაბამისი გადაწყვეტილებების მიღებას ითვალისწინებს.