პოლიტიკა

აფხაზეთის რკინიგზის აღდგენის ინიციატივა საერთოდ გამორიცხავს ჩვენი დევნილების მშვიდობიანად და ღირსეულად დაბრუნების პერსპექტივას - ნიკა რურუა

საქართველოში სომხეთის პრემიერის, კარენ კარაპეტიანის ვიზიტის შემდეგ, გაჩნდა საფუძვლიანი ეჭვი, რომ მან და პრემიერმა კვირიკაშვილმა ისაუბრეს აფხაზეთის რკინიგზის აღდგენაზე, - განაცხადა დღეს გამართულ ბრიფინგზე ნაციონალური მოძრაობის წევრმა, ნიკა რურუამ.

როგორც რურუამ აღნიშნა, აღნიშნულის თქმის საფუძველს იძლევა კარაპეტიანის ,,არაორაზროვანი და მკაფიო განცხადება, რაც შემდეგ დაადასტურა რუსულმა და სომხურმა მედიამ, რომ შეიქმნება ლარსის ალტერნატიული ეკონომიკური გზა.’’

ნაციონალური მოძრაობის წევრის თქმით, აქ სხვა არაფერი არ შეიძლება იყოს ნაგულისხმევი, თუ არა აფხაზეთის რკინიგზის გახსნა.

,,ზედმეტია იმის თქმა, რომ ეს სრულიად დაუშვებელია, ვინაიდან სასიკვდილო ჭრილობას მიაყენებს აფხაზეთის რკინიგზის გახსნა ასე ყველანაირი წინაპირობის გარეშე, საქართველოს ტერიტორიულ მთლიანობას, გამორიცხავს დევნილების დაბრუნებას, ასევე, გამორიცხავს ჩვენი არაღიარების პოლიტიკის შენარჩუნებას და საერთოდ საქართველოს ერთიანობის და სუვერენიტეტის ადრე თუ გვიან აღდგენას ამ ტერიტორიაზე”.

მისი თქმით, ეს ყველაფერი ხდება ქართველი ხალხის ზურგსუკან და სრულიად დაუშვებელია.

,,იგივე ინფორმაცია გაჟღერდა აბაშიძე-კარასინის ფორმატში, რომელიც მინდა ვთქვა, რომ აშკარად სცილდება საკუთარი იურისდიქციის, საკუთარი უფლებების საზღვარს, ვინაიდან ეს ფორმატი შექმნილია, როგორც ვიცით, მხოლოდ ეკონომიკური საკითხებისთვის. აფხაზეთის რკინიგზის გახსნა არის ცალსახად პოლიტიკური საკითხი. ბატონი აბაშიძე უნდა გამოცხადდეს საქართველოს პარლამენტში და ჩვენი საპარლამენტო დელეგაციის წინაშე ყველა იმ კითხვას გასცეს პასუხი, რომელიც ლეგიტიმურად არსებობს.

ვიმეორებ, აფხაზეთის რკინიგზის გახსნა, მით უმეტეს ქართველი ხალხის ზურგსუკან არის ღია ღალატი ეროვნული ინტერესებისა და არის სრულიად დაუშვებელი, როგორც აშკარად მტრული ნაბიჯი, რომელიც ახეირებს მხოლოდ რუსეთს, სეპარატისტებს და სომხეთს.

ეს ნაბიჯი წარმოუდგენლად გაგვიფუჭებს ეკონომიკურ მდგომარეობას, რადგან დაასუსტებს ფოთის პორტის და ახალქალაქ-ბაქოს რკინიგზის თვირთბრუნვას და ძალიან გაგვიფუჭებს ურთიერთობას აზერბაიჯანთან.

შესაბამისად, მთლიანად გამოსარიცხია ამ ეტაპზე ყველანაირი წინაპირობის გარეშე აფხაზეთის რკინიგზის აღდგენა და ამ კულუარულ მოლაპარაკებებს უნდა მიეცეს ფართო საზოგადოებრივი განსჯის ფორმატი.

თუ ეს არ გააკეთა ხელისუფლებამ, აუცილებლად მივმართავთ პროტესტის უკიდურეს ზომებს. ამას მოყვება დიდი სახალხო მღელვარება, რადგან ეს ინიციატივა აშკარად მოღალატურია და ის საერთოდ გამორიცხავს ჩვენი დევნილების როდესმე მშვიდობიანად და ღირსეულად დაბრუნების პერსპექტივას, ისევე როგორც, საქართველოს ტერიტორიული მთლიანობის აღდგენას’’, - განაცხადა ნიკა რურუამ.

ნინო ექვთიმიშვილი