პოლიტიკა

აფგან მუხთარლის საქმეზე დაწყებული გამოძიების მიერ რაიმე არსებითი შედეგის მიღწევის შესახებ ცნობილი არ არის - Amnesty International-ი

საერთაშორისო ორგანიზაციის Amnesty International-ის ყოველწლიურ ანგარიშში მოხსენიებულია თბილისიდან 29 მაისს გაუჩინარებული აზერბაიჯანელი ჟურნალისტის, აფგან მუხთარლის საქმე და მასზე მიმდინარე გამოძიება.

ანგარიშში ნათქვამია, რომ გაუჩინარებიდან მეორე დღეს ჟურნალისტის აზერბაიჯანში დაკავების შესახებ ცნობილი გახდა.

მოხსენებაში წერია, რომ ქართულმა მხარემ გამოძიება დაიწყო, რომლის შედეგები უცნობია.

„მუხთარლის მიმართ წაყენებული ცრუ ბრალდებით, აზერბაიჯანის პროკურატურა მას საზღვრის უკანონოდ კვეთასა და კონტრაბანდული ფულის გადატანაში ედავება. მუხთარლიმ საკუთარ ადვოკატს განუცხადა, რომ ის გაიტაცა და საზღვარი გადააკვეთინა ქართულად მოსაუბრე რამდენიმე მამაკაცმა, რომელთა შორის ზოგს საქართველოს კრიმინალური პოლიციის უნიფორმა ეცვა. ხელისუფლებამ საქმეში ქართველი სამართალდამცავების ჩართულობა უარყო, თუმცა მუხთარლის ბრალდებების შესწავლის მიზნით გამოძიება დაიწყო. გამოძიების მიერ რაიმე არსებითი შედეგის მიღწევის შესახებ ცნობილი არ არის. წლის ბოლოსთვის, მუხთარლი აზერბაიჯანში პატიმრობაში რჩებოდა“, - წერია Amnesty International-ის ანგარიშში.