სამართალი

ადვოკატი ამბობს, რომ ამის მტკიცებულებები გააჩნია - ნატო ჩხეიძე

ტელეკომპანია „იბერიას“ დამფუძნებელი, პარლამენტის წევრი ნატო ჩხეიძე "ომეგა ჯგუფის" საქმეზე ახალ ჩანაწერებზე არ საუბრობს, თუმცა ამბობს, რომ მათ მიერ დაქირავებულ ბრიტანელ უფლებადამცველს ის მტკიცებულებები აქვს, რომელიც სარჩელის მისაღებად საკმარისია.

„სარჩელი შედგენილია იმ ფორმულირებით, რა ფორმულირებაც იქაურმა კანონმდებლობამ ჩათვალა საჭიროდ. როგორც ადვოკატი ამბობს, ამის მტკიცებულებები გააჩნია. ფარულ აუდიო ჩანაწერებზე ვერაფერს მოგახსენებთ, მაგრამ სასამართლო პროცესზე რომ უნდა წარდგნენ და იქ ილაპარაკონ ახდილად ეს აშკარაა“, - ამბობს ჩხეიძე.

დეპუტატი დღეს პარლამენტის თავმჯდომარის გუშინდელ განცხადებასაც გამოეხმაურა.

„მთავარი მოწოდება, რაც პარლამენტის თავმჯდომარემ გუშინ ბრძანა იყო, რომ უნდა დაიჭირონ ოქუაშვილი. ეს არის მესიჯი პროკურატურის მიმართ, თუ როგორ უნდა წარმართოს საქმე.

როდესაც ჩუბინაშვილი ყველა აუდიოჩანაწერში იძახის იმას, რომ ჩხარტიშვილს კოლოფზე 2.5 მიაქვს ზევით, ხოლო ოქუაშვილი იძახის, რომ არ მისცა ტელეკომპანია "იბერია" და არ მისცა კონტრიბუცია, ამ მოცემულობაში, ვინ არის დასაჭერი ძალიან ადვილი გამოსაცნობია,“-ამბობს ნატო ჩხეიძე.

ცნობისთვის, ბიძინა ივანიშვილს, დიმიტრი ქუმსიშვილს და ყველა იმ პირს, რომელიც ფარულ ჩანაწერებში ფიგურირებს, სავარაუდოდ, ლონდონში დაკითხვაზე დაიბარებენ.