სამართალი

ადრე თუ გვიან, მაინც მოუწევთ 2013 წლის პრეზიდენტ სააკაშვილის ხარჯების გამომზეურება - თემურ ჯანაშია

სახელმწიფო დაცვის სპეციალური სამსახურის ყოფილი უფროსის, ე.წ. პიჯაკების საქმეზე ბრალდებულის, თემურ ჯანაშიას განცხადებით, პროკურატურა მალავს ექს-პრეზიდენტ მიხეილ სააკაშვილის 2013 წლის ხარჯებს.

„ეს ის ხარჯებია, რომელიც პროკურატურას ამოღებული აქვს და საზოგადოებას უმალავს, ამაში ჩართულია, სამწუხაროდ, თვითონ პრეზიდენტიც, რომელიც 2013 წლის შემდგომ განკარგულებებს გრიფით საიდუმლოს არ ხსნის.

ისეთ სურათს ქმნიან, თითქოს მხოლოდ 2012 წლამდე იწეოდა პრეზიდენტის წარმომადგენლობითი ხარჯები. დღეს უკვე მეშვიდე სასამართლო გაიმართა, დაველოდები იმ პროცესებს, როცა პროკურატურა ჩემი მუშაობის პერიოდის განხილვაზე გადავა. ადრე თუ გვიან, მაინც მოუწევთ 2013 წლის პრეზიდენტ სააკაშვილის ხარჯების გამომზეურება და ვნახავთ, რომ თანხები აბსოლუტურად ერთი და იმავე სქემით, პრეზიდენტის განკარგულების მიხედვით იხარჯებოდა. ეს ხარჯები აბსოლუტურად ლეგიტიმური იყო და კანონთან წინააღმდეგობაში არ მოდიოდა“, -თქვა ჯანაშიამ.

დღეს დასრულდა მორიგი სასამართლო განხილვა ე.წ. პიჯაკების საქმეზე, რომლის მიხედვით ექს-პრეზიდენტ მიხეილ სააკაშვილსა და სახელმწიფო დაცვის სპეციალური სამსახურის ყოფილ უფროსს, თემურ ჯანაშიას სახელმწიფო ბიუჯეტის კუთვნილი თანხის გაფლანგვაში ედავება პროკურატურა.

მომდევნო სხდომა 26 დეკემბერს გაიმართება.