პოლიტიკა

ადამიანის უფლებათა დაცვის კომიტეტის წევრებმა იდეის დონეზე მხარი დაუჭირეს რელიგიური გრძნობების შეურაცხყოფისთვის სისხლისსამართლებრივ დასჯას

ადამიანის უფლებათა დაცვის საპარლამენტო კომიტეტის წევრებმა იდეის დონეზე მხარი დაუჭირეს დეპუტატ ემზარ კვიციანის საკანონმდებლო ინიციატივას, რომლის თანახმად რელიგიური გრძნობების შეურაცხყოფა სისხლის სამართლის წესით დასჯადი ქმედება გახდება.

სპეციალურად ამ საკანონმდებლო პროექტისთვის შეიქმნება სამუშაო ჯგუფი, რომლის შემადგენლობაში შევლენ საპატრიარქოსა და სხვა კონფესიების წარმომადგენლები. ადამიანის უფლებათა დაცვის საპარლამენტო კომიტეტის წევრებმა „პატრიოტთა ალიანსის“ წარმომადგენლის ინიციატივას იმ პირობით დაუჭირეს მხარი, რომ სამუშაო ჯგუფის ფორმატში ის გადამუშავდება.

კომიტეტის თავმჯდომარის, სოფიო კილაძის თქმით, საკანონმდებლო ცვლილებებში ბალანსის დაცვა იქნება საჭირო, რომ რელიგიური და სიტყვის თავისუფლება ერთმანეთთან წინააღმდეგობაში არ მოვიდეს.

„ბოლო პერიოდში ფაქტები ვიხილეთ, რასთან დაკავშირებითაც კონსულტაცია საპატრიარქოსთანაც მქონდა. მართლმადიდებელი წმინდანების არასათანადო ფორმით წარმოჩენისთვის ბევრი ადამიანი შეურაცხყოფილია, რასაც ვემიჯნები და ვგმობ. ვფიქრობ, გარკვეული სამუშაო ჩასატარებელია და საკითხები სამართლებრივ რეგულაციებშია მოსაქცევი ისე, რომ რელიგიური და სიტყვის თავისუფლება ერთმანეთთან წინააღმდეგობაში არ მოვიდეს. ბალანსის დაცვა ისე შეგვიძლია, როგორც ბევრ ქვეყანაშია“, – განაცხადა კილაძემ.

კვიციანის ინიციატივის მიხედვით, რელიგიური სიწმინდეების, რელიგიური ორგანიზაციის, ღვთისმსახურისა და მორწმუნის მიმართ საჯარო გამოხატვა ან ისეთი მასალის გამოქვეყნება ან ჩვენება, რომელიც მიზნად ისახავს მორწმუნეთა გრძნობების შეურაცხყოფას, ისჯება ჯარიმით ან თავისუფლების აღკვეთით ვადით ერთ წლამდე. ჯარიმით ან ორ წლამდე თავისუფლების აღკვეთით დაისჯება რელიგიური შენობებისა და სხვა რელიგიური სიწმინდეების წაბილწვა, მასზე ნებისმიერი წარწერის გაკეთება ან დაზიანება.