პოლიტიკა

ადა მარშანია-უჩა ნანუაშვილს: გასაკვირია თქვენი უყურადღებობა 350 ათასი დევნილის მიმართ

პარლამენტის პლენარულ სხდომაზე, დეპუტატებმა სახალხო დამცველის 2016 წლის ანგარიში მოისმინეს.

„პატრიოტთა ალიანსის“ წევრმა, ადა მარშანიამ უკმაყოფილება გამოთქვა იმის გამო, რომ უჩა ნანუაშვილის ანგარიშში დევნილთა საკითხმა პატარა ადგილი დაიკავა, მაშინ როდესაც, მარშანიას თქმით, პენიტენციური სისტემის პრობლემები, ანგარიშის დიდ ნაწილს იკავებს.

ადა მარშანიამ სხდომაზე ომბუდსმენს შესაბამისი შინაარსის კითხვით მიმართა.

„ბატონო ომბუდსმენო, ძალიან გასაკვირია თქვენი უყურადღებობა 350 ათასი ადამიანის მიმართ. ძალიან მწირია ინფომაცია, თქვენი რეკომენდაციები და შენიშვნები დევნილების მიმართ. მე დავთვალე სპეციალურად , 17 წინადადება მიუძღვენით თქვენ ამ საკითხს. ანგარიში სრულად არის პენიტენციალურ სისტემას მიძღვნილი, სრულად, წვრილად, დეტალებში -რაც მე მიხარია. ვის თუ არა ჩვენ გვიბრძოლია პატიმრების უფლებებზე, ვინ თუ არა ჩვენ დღე და ღამე ქუჩაში ვიდექით ამისთვის, მაგრამ უკაცრავად, გარეთ მყოფ, ასე ვთქვათ, თავისუფლებაზე მყოფი ხალხი, იმსახურებს ამ წვრილ, რამდენიმე წინადადებას და დევნილები 17 წინადადებას?!“,-განაცხადა მარშანიამ

უჩა ნანუაშვილმა საპასუხოდ აღნიშნა, რომ ანგარიშში დევნილების თემას მართლაც 17 გვერდია მიძღვნილი, თუმცა ომბუდსმენის თქმით, იქ მკაფიოდ არის ნათქვამი, რომ „თუ რატომ ხდება უარყოფითი გადაწყვეტილების მიღება კონკრეტული დევნილის მიმართ საცხოვრებლით დაკმაყოფილებასთან დაკავშირებით“.

„დიახ, 17 გვერდი არის ამ ამგარიშში დევნილთა უფლებრივი მდგომარეობის შესახებ. ჩვენ ვსაუბრობთ ძალიან ბევრ საკითხსზე. მათ შორის იმაზე, რომ უნდა მოხდეს სამართლებრივად დასაბუთება იმის, თუ რატომ ხდება უარყოფითი გადაწყვეტილების მიღება, თუნდაც კონკრეტული დევნილის მიმართ საცხოვრებლით დაკმაყოფილებასთან დაკავშირებით“,-განაცხადა ნანუაშვილმა.

მონიკა დავლიანიძე