პოლიტიკა

აჭარის უმაღლესი საბჭოს თავმჯდომარის თანამდებობა შესაძლოა, ნუგზარ სურმანიძემ დაიკავოს

გავრცელებული ინფორმაციით, აჭარის უმაღლესი საბჭოს თავმჯდომარის თანამდებობას ,,ქართული ოცნების’’ სიის პირველი ნომერი ნუგზარ სურმანიძე დაიკავებს, რომელიც აჭარის ავტონომიური რესპუბლიკის ჯანდაცვის მინისტრი იყო.

ნუგზარ სურმანიძე ინფორმაციას არ ადასტურებს, თუმცა არც იმას გამორიცხავს, რომ მან დაიკავოს უმაღლესი საბჭოს თავმჯდომარის თანამდებობა.

„როგორც ვიცი, ,,ქართული ოცნებიდან’’ შედის 14 დეპუტატი. გაიმარჯვა ოთხმა პარტიამ. ორი პარტიის თითო წარმომადგენლია და ,,ნაციონალური მოძრაობის’’ - 5. ასე რომ, ჩვენთან იქნება ,,ქართული ოცნების’’ უმრავლესობა.

უმაღლესი საბჭოს თავმჯდომარის კანდიდატურასთან დაკავშირებით ჯერ კონსულტაციები არ გამართულა. როგორც კი გაიმართება კონსულტაციები, უმრავლესობა თავისი რიგებიდან დაასახელებს ღირსეულ კანდიდატს, “ - აცხადებს სურმანიძე რუსთავი 2-თან საუბარში.

რაც შეეხება ,,ნაციონალურ მოძრაობას,’’ შევა თუ არა პარტია აჭარის უმაღლეს საბჭოში, ჯერჯერობით უცნობია. პარტიის ლიდერების განცხადებით, გადაწყვეტილება მას შემდეგ გახდება ცნობილი, რაც ოფიციალური შედეგები გამოქვეყნდება.

ცნობისათვის: აჭარის უმაღლეს საბჭოში ოთხი პარტია შევიდა. 14 მანდატი აქვს ,,ქართულ ოცნებას,’’ 5 ,,ნაციონალურ მოძრაობას’’, 1 პატრიოტთა ალიანსს და 1 ნინო ბურჯანაძის ,,დემოკრატიულ მოძრაობას.’’
ამასთან, როგორც ცნობილია, ,,პატრიოტთა ალიანსის’’ სიის პირველი ნომერი დავით თარხან-მოურავი არ აპირებს უმაღლეს საბჭოში შესვლას და მან თავისი მანდატი პარტიის სიის მეორე ნომერს, ზაზა ოქუაშვილს დაუთმო.

ნინო ექვთიმიშვილი