სამართალი

აჭარის საპატრულო პოლიციის უფროსმა 11-12 მარტს განვითარებულ მოვლენებზე ჩვენება მისცა

აჭარის საპატრულო პოლიციის უფროსმა კახაბერ ბუხრაძემ, 11-12 მარტს ბათუმში განვითარებულ მოვლენებთან დაკავშირებით გამოძიებას ჩვენება 16 მარტს მისცა.

თუმცა, ამის შესახებ მედიისთვის, კერძოდ კი, გაზეთ „ბათუმელებისთვის“ გუშინ გახდა ცნობილი, მას შემდეგ რაც საქმის მასალები ადვოკატებს გადასცეს, რომლებიც აქციის შემდეგ სისხლის სამართლის წესით დაკავებულების ინტერესებს იცავენ.

ბუხრაძის ჩვენებიდან ირკვევა, რომ იგი 11-12 მარტს ბათუმში არ იმყოფებოდა, შესაბამისად არ შეუძლია, როგორც თვითმხილველმა მოჰყვეს მოვლენების წარმოშობის, მათი განვითარების და დასრულების შესახებ.

„ბათუმელები“ აღნიშნავს, რომ გამოძიებისთვის მიცემულ ჩვენებაში, კახა ბუხრაძე ყველაზე მეტად მერაბ ღოღობერიძეზე საუბრობს. აღწერს, რომ მისი დანიშვნიდან დაახლოებით 10 დღეში, მერაბ ღოღობერიძემ და გოჩა შავაძემ, როგორც არასამთავრობო ორგანიზაციის წარმომადგენლებმა, შეხვედრა სთხოვეს. ამბობს, რომ შეხვედრის დროს, მას ადგილობრივი ადათ-წესების და ძველი კადრების შენარჩუნება სთხოვეს.

კახა ბუხრაძის თქმით, მერაბ ღოღობერიძემ მას ასევე სთხოვა არ დაეჯარიმებინა პატრულს, რადგან ის მართვის მოწმობის გარეშე მართავს ავტომანქანას.

„უარი ვუთხარი. დამემუქრა, მალე კორუფციაში გამხელო“, – დასძინა აჭარის საპატრულო პოლიციის უფროსმა.

ამავე ჩვენებაში კახა ბუხრაძე მერაბ ღოღობერიძესთან სატელეფონო მიმოწერაზე საუბრობს, რაც მას შენახული აქვს იმის დასტურად, რომ ღოღობერიძე მისგან თურქული ტრაილერების შეუფერხებლად გატარებასაც მოითხოვდა.

„მას შემდეგ, რაც მე მას უარი ვუთხარი თურქული ტრაილერების დაჩქარებულად გატარების თაობაზე, ფეისბუკ გვერდზე, ტელევიზიასა და პრესაში ჩემი მისამართით დაიწყო ნეგატიური ხასიათის ინფორმაციის აქტიური განთავსება“, - განაცხადა კახა ბუხრაძემ.

ამავე ჩვენებაში კახა ბუხრაძე კატეგორიულად უარყოფს შემდეგი ფრაზის „თათრებში წესრიგს ვამყარებ“ გამოყენებას.

მონიკა დავლიანიძე