პოლიტიკა

აბსოლუტურად გაურკვეველია, ვებგვერდიდან გადმოტვირთული სიუჟეტს რანაირად შეიძლება ჩაუტარდეს ექსპერტიზა ავთენტურობაზე - ლევან აღდგომელაშვილი

„ომეგა ჯგუფში“ შემავალი კომპანია „ოჯთ“-ის გენერალურმა მენეჯერმა ლევან აღდგომელაშვილმა ბიზნესმენ ვანო ჩხარტიშვილის ადვოკატ ზაზა ხატიაშვილის განცხადებაზე საუბრისას თქვა, რომ გაურკვეველია, რატომ გადაწყვიტა ჩხარტიშვილის დაცვის მხარემ „იბერია ტვ“-ის ვებგვერდიდან გადმოტვირთული ფაილის ავთენტურობის დადგენა.

„იმ დასკვნაში გარკვევით წერია, რომ ჩატარებული კვლევა არა ორიგინალურ ფაილზეა და შესაბამისად, ორიგინალური ფაილის არსებობის შემთხვევაში შეიძლება დასკვნა შეიცვალოს, ვსაუბრობ ავთენტურობაზე.

რაც შეეხება იმ დასკვნას, რომელიც ხატიაშვილმა გაასაჯაროვა და დიდი ხანია აფრიალებს. მინდა, კიდევ ერთხელ განვმარტო, რომ ექსპერტიზა ჩაუტარდა „იბერიას“ საიტიდან გადმოწერილ ვიდეომასალას.

შესაბამისად, აბსოლუტურად გაურკვეველი არის სიუჟეტით, რომელიც გადმოტვირთულია ვებგვერდიდან, რანაირად შეიძლება ჩაუტარდეს ექსპერტიზა ავთენტურობაზე“, - თქვა აღდგომელაშვილმა.

ხატიაშვილმა დღევანდელ პრესკონფერენციაზე განაცხადა, რომ მედიაში გავრცელებული აუდიოჩანაწერების ავთენტურობის დასადგენად, ჩხარტიშვილის დაცვის მხარემ ლონდონის ორ ცნობილ საექსპერტო ბიუროს მიმართა და არა ორიგინალი, არამედ ტელევიზიებიდან ჩამოწერილი ჩანაწერები მიაწოდა, რის შედეგადაც, დადგინდა, რომ ვანო ჩხარტიშვილზე გავრცელებული სამივე ფარული აუდიოჩანაწერი გადაკეთებული, მანიპულირებული და დამონტაჟებულია.