პოლიტიკა

94-ე მუხლში 12-წლიანი დათქმა დაიდო - ირაკლი კობახიძე

საქართველოს პარლამენტის თავმჯდომარის, ირაკლი კობახიძის განცხადებით, 94-ე მუხლთან დაკავშირებით 12-წლიანი დათქმა ამოქმედდება. დათქმის თანახმად, ამ დროის განმავლობაში ერთ სულ მოსახლეზე მთლიანი შიდა პროდუქტი დაახლოებით 10 000 დოლარამდე გაიზრდება, რაც ხელს შეუწყობს ახალი ეკონომიკური პოლიტიკის შემუშავებას, კერძოდ, 94-ე მუხლის ამოღებას.

კობახიძემ აღნიშნა, რომ 94-ე მუხლთან (ახალი რედაქციით - 67-ე მუხლთან) დაკავშირებით საკონსტიტუციო კომისიამ კონსულტაციები გაიარა მთავრობასთან.

„რაც შეეხება 94-ე მუხლს, ახალი ცვლილებებით 67-ე მუხლს, თუ რატომ განისაზღვრა 12 წელი. ეს არის ის საკითხი, სადაც განსაკუთრებული კონსულტაციები გვჭირდებოდა ჩვენ საქართველოს მთავრობასთან, რადგან საქმე ეხება მთავრობის საქმიანობის ერთ-ერთ საკვანძო სფეროს - ეკონომიკურ სფეროს. მთავრობის პოზიცია მდგომარეობს იმაში, რომ ამ ვადით უნდა იყოს განსაზღვრული დროებითი რეგულაცია. საორიენტაციო 12 წელიწადში ქვეყნის მთლიანი შიდა პროდუქტი ერთ სულ მოსახლეზე მიაღწევს დაახლოებით, უხეშად 10 000 დოლარს, ამის შემდეგ უკვე შესაძლებელი გახდება უფრო მოქნილი ეკონომიკური პოლიტიკის წარმოება - ეს არის დაახლოებით პოზიციის არსი. ამ მიდგომიდან გამომდინარე, 12- წლიანი დათქმა ჩაიდო შესაბამის მუხლში“, - განაცხადა კობახიძემ პარლამენტის რიგგარეშე სხდომაზე.

შეგახსენებთ, 94-ე მუხლის მიხედვით, მთავრობას არ აქვს უფლება მოსახლეობის აზრის, რეფერენდუმის გამართვის გარეშე საერთო-სახალხო გადასახადები გაზარდოს. საკონსტიტუციო პროექტის გარდამავალ დებულებაში შევა ინიციატივა, რომლის მიხედვით, საერთო-სახელმწიფოებრივ გადასახადებზე რეფერენდუმის ჩატარების ვალდებულება 12 წლის განმავლობაში იარსებებს.

ანა მებურიშვილი