სამართალი

40-მა კანდიდატმა დამოუკიდებელი ინსპექტორის პოზიციაზე შეიტანა განაცხადი - კანდიდატურებზე იუსტიციის უმაღლესი საბჭოს სხდომაზე მსჯელობენ

ამ წუთებში მიმდინარეობს იუსტიციის უმაღლესი საბჭოს სხდომა, რომლის დღის წესრიგში 6 საკითხია დაყენებული. პირველ საკითხადაა წარდგენილი მსჯელობა სამოსამართლეო საქმიანობის მაკონტროლებელი პირის, ინსპექტორის თანამდებობაზე წარდგენილი კანდიდატურების შესახებ.

„იუსტიციის უმაღლეს საბჭოში გამოცხადებულია კონკურსი დამოუკიდებელი ინსპექტორის შერჩევის მიზნით. სწორედ ამ საკითხს განიხილავს პირველ საკითხად იუსტიციის უმაღლესი საბჭო, რომელიც მიიღებს შემოსული განაცხადების შესახებ ინფორმაციას, თუ რომელი მათგანი აკმაყოფილებს კანონით დადგენილ მოთხოვნებს. ამის შემდეგ ჩვენ განვსაზღვრავთ გასაუბრების ჩატარების თარიღებს და შემდეგი პროცედურების გაგრძელება დაიგეგმება“, - განაცხადა საბჭოს მდივანმა გიორგი მიქაუტაძემ საბჭოს სხდომის დაწყებამდე.

აღნიშნულ პოზიციაზე 40-მა კანდიდატმა შეიტანა განაცხადი.

საბჭოს წევრის, დიმიტრი გვრიტიშვილის განცხადებით, დამოუკიდებელ ინსპექტორს უნდა ჰქონდეს იურიდიული განათლება, ამ სპეციალობით მუშაობის 5-წლიანი სტაჟი და კარგი რეპუტაცია. მან აღნიშნა, რომ ბოლო კრიტერიუმი შეფასებითია და საბჭო ყოველი ინდივიდუალური კანდიდატის შემთხვევაში ამ კრიტერიუმისადმი შესაბამისობას განსაზღვრავს.

ანა მებურიშვილი