პოლიტიკა

300 სარჩელის მოგროვება რთული არაა, მეტი რატომ ვერ მოაგროვეს, მიკვირს - გია ვოლსკი კამპანიაზე „ეს შენ გეხება“

საპარლამენტო უმრავლესობის წევრმა გია ვოლსკიმ კამპანია „ეს შენ გეხებას“ ფარგლებში ე.წ. მოსმენების კანონზე 300-მდე მოქალაქის საკონსტიტუციო სარჩელის შეგროვების ფაქტს გამოეხმაურა.

ვოსლკის განცხადებით, ის ბევრად მეტ სარჩელს ელოდა.

„300 სარჩელის მოგროვება არ არის რთული, ცოტა მეტი რატომ არ მოაგროვეს, ის მიკვირს. მაგრამ, მე ვფიქრობ, პოზიცია, რომელსაც ზოგიერთი არასამთავრობო ორგანიზაციები და პოლიტიკური პარტიები აჟღერებენ, საფუძველმოკლებულია, იმიტომ, რომ სახელმწიფოს პოლიტიკა სხვაგვარია, სახელმწიფო სხვანაირად მოქმედებს, სახელმწიფომ გააკეთა უდიდესი ნაბიჯი იმისაკენ, რომ ადამიანის უფლებები იყოს დაცული, რომელიც არ გამორიცხავს მისი უსაფრთხოების დაცვის ინტერესს. ასე რომ, ეს არის ორი ერთი და იგივე თემა, რომელიც უკავშირდება პატარა საქართველოს დაცულობასა და მისი მოქალაქეების დაცულობას. სისტემა შეიქმნა და ამ სისტემას, ჩემთვის გაუგებარი მიზეზებით, გარკვეული ჯგუფები უპირისპირდება“,- განაცხადა გია ვოლსკიმ.

შეგახსენებთ, რომ დღეს კამპანია „ეს შენ გეხებაში“ შემავალმა არასამთავრობოებმა წარადგინეს ე.წ. ფარული მოსმენების წინააღმდეგ 283 მოქალაქის სარჩელი, რომელიც დღეს საკონსტიტუციო სასამართლოს გადაეგზავნება.

კამპანიის წარმომადგენელტა თქმით, პარლამენტის მიერ დამტკიცებული საკანონმდებლო პაკეტი არაკონსტიტუციურია, ხოლო სპეციალურად ამისთვის შექმნილ სააგენტოს ბევრად გაუადვილდება მოქალაქეთა სატელეფონო ან ინტერნეტკომუნიკაციაზე წვდომა.

„ეს შენ გეხებას“ წევრების განცხადებით, მათ უკვე შეუერთდა ომბუდსმენი. ისინი იმედოვნებენ, რომ საკონსტიტუციო სასამართლოს „სასამართლოს მეგობრის“ მოსაზრებით მიმართავს საქართველოს პრეზიდენტიც.

ე.წ. მოსმენების კანონთან დაკავშირებული სარჩელები სამ ქალაქში: თბილისში, ქუთაისსა და ბათუმში შეგროვდა.

ანა მებურიშვილი