სამართალი

25 წლის ქალის მკვლელობაში ბრალდებულ პირს 16–დან 20 წლამდე ან უვადო პატიმრობა ემუქრება

ბარნოვის ქუჩაზე ახალგაზრდა ქალის მკვლელობაში ბრალდებულ ვეფხია ბაქრაძეს ბრალი დაუმძიმდა. ბრალი გადაკვალიფიცირდა 11 პრიმა 109–ე მუხლად, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს და 16–დან 20 წლამდე ან უვადო პატიმრობას ითვალისწინებს.

შსს-მ თავდაპირველად გამოძიება განზრახ მკვლელობის ფაქტზე დაიწყო, რაც 7-დან 15 წლამდე თავისუფლების აღკვეთას ითვალისწინებს.

25 წლის ქალის მკვლელობისთვის ბრალდებული ბაქრაძე წარსულშიც იყო ნასამართლევი. 2015 წელს სასამართლომ ის დამნაშავედ ცნო ოჯახის წევრის ჯანმრთელობის მძიმე დაზიანებისა და ტრანსპორტის მოძრაობის უსაფრთხოების წესის დარღვევის საქმეზე. 2 წლის შემდეგ პრეზიდენტის შეწყალების საფუძველზე მას სასჯელი გაუნახევრდა და ბაქრაძემ საპატიმრო 2017 წლის 25 მაისს დატოვა. ამის შესახებ ბრიფინგზე შს მინისტრის მოადგილემ ნათია მეზვრიშვილმა განაცხადა.

ახალგაზრდა ქალის მკვლელობაში ბრალდებული პირი სამართალდამცველებმა შაბათს თელეთში დააკავეს.