პოლიტიკა

22 მაისია, ქუჩა გადათხრილი და სამუშაოები მიტოვებულია - ლევან ხაბეიშვილი 94000-ლარიან ტენდერზე

„ნაციონალური მოძრაობის“ საკრებულოს დეპუტატმა ლევან ხაბეიშვილმა ხოშტარიას ქუჩაზე გზის სარეაბილიტაციო სამუშაოებისთვის დახარჯული 94 ათასი ლარის მიზნობრიობისა და შეუსრულებელი ვალდებულებების გამო სარევიზიო კომისიისგან საკითხის შესწავლა მოითხოვა.

გზის სარეაბილიტაციო სამუშაოები 5 მაისს უნდა დასრულებულიყო, თუმცა კომპანია „ნიუ როუდ გრუპმა“ ნაკისრი ვალდებულება დროზე ვერ შეასრულა, რის გამოც მას ჯარიმა დაეკისრა.

თუ ორი დღის ვადაში კომპანიამ სამუშაოები ვერ დაასრულა, მას ხელშეკრულება ცალმხრივად გაუუქმდება.

ხაბეიშვილის თქმით, ქუჩა ისევ გადათხრილია.

„გადაწყვიტეს დაგებულ ასფალტზე, ახალი ასფალტის გადაგება. საუბარია ქალაქის ერთ-ერთ ცენტრალურ უბანზე. (არადა, არავინ უჩიოდა გზას).

გამოაცხადეს ტენდერი. 94 300 ლარის ხელშეკრულება გაუფორმეს რამდენიმე თვით ადრე დაფუძნებულ კომპანიას.

სამუშაოების შესრულების ვადად განუსაზღვრეს 5 მაისი.

4 მაისს ცვლილება შეიტანეს ხელშეკრულებაში, ყველაფერი კარგად არის, უბრალოდ 266 ლარით ნაკლები ჯდება სამუშაოებიო. (კეთილსინდისიერებასა და პატიოსნებას უსვამენ ხაზს).

22 მაისია, ქუჩა გადათხრილი და სამუშაოები მიტოვებულია

P.s. ვინ აგრძელებს და ვის „ტრადიციას“ ?!, - დაწერა ხაბეიშვილმა ფეისბუკზე