პოლიტიკა

22-24 მარტის პლენარული სხდომების დღის წესრიგის საკითხები განისაზღვრა

პარლამენტის ბიუროს სხდომამ 22-24 მარტის პლენარული სხდომების დღის წესრიგის საკითხები განსაზღვრა. სხდომის წამყვანმა, პარლამენტის თავმჯდომარის მოადგილე ზვიად ძიძიგურმა ბიუროს წევრებს კენჭსაყრელი და განსახილველი საკითხების რიგითობა, ახალი საკანონმდებლო ინიციატივები და საორგანიზაციო საკითხები გააცნო.

„მოძრაობა თავისუფლებისათვის - ევროპული საქართველოს“ ფრაქციის თავმჯდომარე გიორგი წერეთელმა კომპანია „გაზპრომ ექსპორტთან“ გაფორმებულ ხელშეკრულებასთან დაკავშირებით, პარლამენტში ენერგეტიკის მინისტრის, კახა კალაძის დაბარებაზე განცხადება გააკეთა და აღნიშნა, რომ ფრაქცია პოლიტიკური დისკუსიის ფორმატში, დიდი ხანია იწვევს მინისტრს, თუმცა იგი პარლამენტში მისვლაზე უარს აცხადებს. მისი განცხადებით, ენერგეტიკის მინისტრის მოსაზრებების გაცნობა მით უფრო საინტერესოა, როცა იგი გაზის ტარიფის სავარაუდო გაზრდაზე განცხადებას აკეთებს. გიორგი წერეთელმა საპარლამენტო უმრავლესობას მინისტრის პარლამენტში მოწვევის და დისკუსიის გამართვის თხოვნით კიდევ ერთხელ მიმართა.

ბიუროს წამყვანის, პარლამენტის თავმჯდომარის მოადგილის განცხადებით, დადგენილების ან რეზოლუციის პროექტის საპარლამენტო ფორმატში განხილვა პრობლემას არ წარმოადგენს და დეპუტატებს დისკუსიის საშუალება ყოველთვის ეძლევათ, რაც შეეხება ენერგეტიკის მინისტრის პარლამენტში მოწვევას, ზვიად ძიძიგურის ინფორმაციით, პარლამენტის თავმჯდომარემ კონსულტაციები უკვე გამართა აღნიშნულთან დაკავშირებით და მის შედეგებს ირაკლი კობახიძე მივლინებიდან დაბრუნების შემდეგ თავად გააცნობს საპარლამენტო უმცირესობის წევრებს.