პოლიტიკა

21 მარტამდე პრეზიდენტს აქვს დრო, რომ ჩამოყალიბდეს, დაადებს თუ არა ვეტოს მოსმენების კანონს - ანა დოლიძე

დღეს საქართველოს პრეზიდენტმა დაასრულა ე.წ. ფარული მოსმენების კანონის შესახებ საკონსულტაციო შეხვედრების ციკლი საპარლამენტო ფრაქციებთან.

მისი საპარლამენტო მდივნისთვის, ანა დოლიძისთვის ჯერ უცნობია, დაადებს თუ არა პრეზიდენტი ამ კანონს ვეტოს. დოლიძის განცხადებით, გიორგი მარგველაშვილს აქვს დრო 21 მარტამდე.

„დავასრულეთ ამით კონსულტაციები ოპოზიციურ ფრაქციებთან. გვაქვს რამდენიმე დღე იმისათვის, რომ ჩამოვყალიბდეთ, ხელს მოვაწერთ თუ არა კანონს, თუ დავუბრუნებთ პარლამენტს ჩვენი მოტივირებული შენიშვნებით. მოგეხსენებათ, რომ გვაქვს კონსტიტუციით განსაზღვრული ვადა 21 მარტამდე და შესაბამისად, გვაქვს საშუალება, ცოტა მეტი დრო დავუთმოთ ანალიტიკასა და მუშაობას“, - განაცხადა დოლიძემ.

დღეს პრეზიდენტი ამ საკითხის განსახილველად ფრაქცია „საქართველოს პატრიოტებს“ შეხვდა, გუშინ კი ე.წ. ფარული მოსმენების შესახებ „ევროპულ საქართველოსა“ და „ერთიან ნაციონალურ მოძრაობას“ ესაუბრა.

შეგახსენებთ, რომ 1-ლ მარტს პარლამენტმა მესამე მოსმენით მხარი დაუჭირა უმრავლესობის მიერ შემუშავებულ საკონსტიტუციო ცვლილებათა პაკეტს ე.წ. ფარული მოსმენების შესახებ. აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო. სასამართლომ პარლამენტს დააკისრა ცვლილებების შეტანის ვალდებულება 2017 წლის 31 მარტამდე.

ანა მებურიშვილი