პოლიტიკა

2018 წელს ჩვენ არ გვაქვს იმის საშუალება, რომ მივიღოთ გადაწყვეტილება ხელფასების ზრდასთან დაკავშირებით - ირაკლი ხმალაძე

თბილისის ვიცე-მერის, ირაკლი ხმალაძის განცხადებით, მიმდინარე წელს მერიას არ აქვს ფინანსური საშუალება მეტროს მემანქანეების ხელფასების გასაზრდელად.

რაც შეეხება 2019 წელს, ხმალაძემ განაცხადა, რომ მერია შეხედავს, რა საშუალება ექნება.

„გუშინ ასეთი კონკრეტიკა არ ყოფილა თუ რამდენპროცენტიან ზრდაზეა საუბარი, მაგრამ ჩვენი მესიჯი რაც იყო და მივაწოდეთ მეტროს გაფიცულ თანამშრომლებს, 2019 წელს შევხედოთ, რისი საშუალება ექნება მერიას იმისთვის, რომ მივიღოთ სამართლიანი და ობიექტური გადაწყვეტილებები. ჩვენ არ ვართ იმ პირობებში, რომ ვიმსჯელოთ, 10%, 15% თუ 20%. 2018 წელს ჩვენ არ გვაქვს იმის საშუალება, რომ მივიღოთ გადაწყვეტილება ხელფასების რაიმე ოდენობით ზრდასთან დაკავშირებით. გვინდა, ვუთხრათ ამ ადამიანებს და ზოგადად, მერიის სისტემაში მომუშავე ადამიანებს, რომ ჩვენ მუდმივად ვიზრუნებთ იმაზე, რომ მათი შრომის ანაზღაურება იყოს სათანადო", - განაცხადა ხმალაძემ.

ცნობისთვის, უკვე მესამე დღეა მეტროს მემანქანეები გაფიცული არიან. ისინი ხელფასის მომატებას ითხოვენ. გაფიცვის გამო ორშაბათიდან პარალიზებულია მეტრო.