პოლიტიკა

2017 წლის ადგილობრივი თვითმმართველობის არჩევნებისა და წინასაარჩევნო პერიოდში პარტიებმა 27 270 568 ლარი დახარჯეს

სახელმწიფო აუდიტის სამსახურის მიერ ჩატარებულმა პოლიტიკური პარტიების მონიტორინგმა გამოავლინა, რომ პარტიებმა 2017 წლის ადგილობრივი თვითმმართველობის არჩევნებისა და წინასაარჩევნო პერიოდში ჯამურად 27 270 568 ლარი დახარჯეს.

მონიტორინგი მოიცავს 2017 წლის 1 ივნისიდან 19 ნოემბრის ჩათვლით პერიოდს.

საანგარიშო პერიოდში ყველაზე მეტი თანხა – 17 600 948 ლარი პარტიამ „ქართული ოცნება – დემოკრატიული საქართველო“ დახარჯა. მეორე ადგილზე დახარჯული 2 078 378 ლარით „ერთიანმა ნაციონალურმა მოძრაობამ“ დაიკავა. 1 523 360 ლარი დახარჯა „საქართველოს პატრიოტთა ალიანსმა“, 1 484 891 ლარი კი – პარტიამ „ევროპული საქართველო-მოძრაობა თავისუფლებისთვის“.

აუდიტის სამსახურის ანგარიშის მიხედვით, საანგარიშო პერიოდში საარჩევნო სუბიექტების მიერ მიღებულმა შემოწირულობებმა ჯამურად 16 418 892 ლარი შეადგინა.

ყველაზე მეტი შემოწირულობა - 14 815 653 ლარი მმართველმა გუნდმა მიიღო, მას მოჰყვებიან „ევროპული საქართველო“ 951 834 ლარით, ენმ 122 496 ლარითა და „პატრიოტთა ალიანსი“ 66 392 ლარით.