პოლიტიკა

2017 წელს საჯარო სამსახურის ბიურომ 10 მოქმედ და 2 ყოფილ პარლამენტარს 1000-ლარიანი ჯარიმა დააკისრა

2017 წელს 10 მოქმედ და 2 ყოფილ პარლამენტარს ქონებრივ დეკლარაციებში აღმოჩენილი ხარვეზების გამო 1000-ლარიანი ჯარიმა დაეკისრა. აღნიშნული მონაცემები საჯარო სამსახურის ბიურომ გამოაქვეყნა.

მისივე ინფორმაციით, ჯარიმა დაეკისრათ საპარლამენტო უმრავლესობის შემდეგ წევრებს: არჩილ თალაკვაძეს, აკაკი ზოიძეს, გუგული მაღრაძეს, მიხეილ ყაველაშვილს, ოთარ ჩრდილელს, ირაკლი აბუსერიძეს, ზვიად კვაჭანტირაძეს, თამაზ ნავერიანსა და პაატა მხეიძეს.

ასევე დაჯარიმდა დამოუკიდებელი დეპუტატი რამაზ ნიკოლაიშვილი და ორი ყოფილი პარლამენტარი - თემურ მაისურაძე და ვლადიმერ აჩბა.

სულ შემოწმდა 15 თანამდებობის პირი - აქედან 14 პარლამენტარია, ხოლო 1 პარლამენტის თანამშრომელი.
აღნიშნულებიდან 13 პირი (12 პარლამენტარი და 1 პარლამენტის თანამშრომელი) უარყოფითად შეფასდა, ხოლო 2 დეპუტატი არ დაჯარიმებულა.

2017 წელს, „შესამოწმებელი თანამდებობის პირის ქონებრივი მდგომარეობის დეკლარაციის მონიტორინგის ინსტრუქციის დამტკიცების შესახებ" საქართველოს მთავრობის 2017 წლის 14 თებერვლის N81 დადგენილების შესაბამისად შემოწმებას დაექვემდებარა მხოლოდ დეკლარაციის მონიტორინგის ელექტრონული სისტემის მიერ დეკლარაციების შემთხვევითი შერჩევითა და დასაბუთებული წერილობითი განცხადების საფუძველზე შერჩეული თანამდებობის პირების დეკლარაციები.

წლის განმავლობაში შესამოწმებელი დეკლარაციების რაოდენობა შეადგენდა 284 დეკლარაციას.

მონიტორინგის შედეგად 224 დეკლარაცია შეფასდა უარყოფითად, ხოლო 56 დეკლარაცია შეფასდა დადებითად.

მონიტორინგის შედეგების ანგარიში საჯარო სამსახურის ბიურომ 2017 წლის 29 დეკემბერს გამოაქვეყნა