პოლიტიკა

2017 წელს 50-ის ნაცვლად უკვე 80 ქართველი სტუდენტი შეძლებს უნგრეთის მთავრობის სტიპენდიით ისარგებლოს

საქართველოს პრემიერ-მინისტრმა გიორგი კვირიკაშვილმა უნგრელ კოლეგასთან ვიქტორ ორბანთან შეხვედრის დეტალებზე ისაუბრა. მისი თქმით, რამდენიმე შეთანხმებას მოეწერა ხელი. კვირიკაშვილმა გამოყო ორ ქვეყანას შორის თანამშრომლობა საგანმანათლებლო გაცვლითი პროგრამების მიმართულებით.

კვირიკაშვილმა აღნიშნა, რომ 2017 წელს გაიზრდება უნგრეთის მთავრობის სტიპენდიის მიმღებ სტუდენტთა რიცხვი.

„განსაკუთრებული მადლიერებით მსურს, გამოვყო თანამშრომლობა საგანმანათლებლო გაცვლითი პროგრამების ფარგლებში, რომელიც ქართველ სტუდენტებს უნგრეთის წამყვან უნივერსიტეტებში ხარისხიანი განათლების მიღების შესაძლებლობას ეძლევა. ამასთანავე სასიხარულოა, რომ უნგრეთის მთავრობის გადაწყვეტილებით, მიმდინარე წლიდან 50-ის ნაცვლად უკვე 80 ქართველი სტუდენტი შეძლებს, ხსენებული სტიპენდიებით სარგებლობას. მე ასევე მადლობა მინდა ვუთხრა ჩემს კოლეგას, ჩემს მეგობარს, ბატონ ვიქტორ ორბანს იმისათვის, რომ მან გააჟღერა ინიციატივა საშუალო განათლების მიმართუილებით მათი მხრიდან სტიპენდიების გამოყოფის თაობაზე, რათა საშუალო განათლების დონეზე მოხდეს პრაგმატული უნარ-ჩვევების შეძენა ჩვენი მოქალაქეების მიერ, განსაკუთრებით სოფლის მეურნეობის განვითარების მიმართულებით“, - განაცხადა საქართველოს პრემიერ-მინისტრმა.

ანა მებურიშვილი