პოლიტიკა

2008 წელს სააკაშვილმა დაბომბა საკუთარი მოსახლეობა, საქართველომ არა, სააკაშვილმა - ბიძინა ივანიშვილი

პარტია „ქართული ოცნების“ თავმჯდომარის, ბიძინა ივანიშვილის მტკიცებით, 2008 წელს საქართველოს მაშინდელმა პრეზიდენტმა მიხეილ სააკაშვილმა „დაბომბა მშვიდობიანი მოსახლეობა“. ასე უპასუხა მან შეკითხვას, რომელიც კრემლის მიერ სალომე ზურაბიშვილის ციტატების ჰააგის სისხლის სამართლის სასამართლოში შესაძლო გამოყენებას ეხებოდა.

ექს-პრემიერმა პირდაპირი პასუხს თავი აარიდა, თუმცა დაადასტურა, რომ სალომე ზურაბიშვილის მოსაზრებას აგვისტოს ომთან დაკავშირებით იზიარებს.

„სააკაშვილმა დაბომბა საკუთარი მოსახლეობა, საქართველომ არა, სააკაშვილმა. 2008 წელს რაც მოხდა და როგორც მოქმედებდა მაშინდელი მთავრობა სააკაშვილის მეთაურობით, ეს იყო სწორედ ღალატი ქვეყნისა და სამშობლოსი, მას შეეძლო, ეს ომი თავიდან აეცილებინა ქვეყნისთვის, მას შეეძლო, არ აეხდინა რუსეთის მრავალსაუკუნოვანი ოცნება. ჩემს ინტერპრეტაციასა და ქალბატონი სალომეს ინტერპრეტაციას აბსოლუტურ თანხვედრაშია, კიდევ ერთხელ შევახსენებ საზოგადოებას - თუ არა მაშინდელი ხელისუფლების წინდაუხედავი, ყველაზე რბილია, თუგინდ ღალატობრივი ქმედებაც კი, რუსეთი ვერ მოახერხებდა და ვერ აიხდენდა მრავალსაუკუნოვან ოცნებას და ვერ დაიპყრობდა საქართველოს ტერიტორიებს. სწორედ რომ სააკაშვილი, თქვენი მეუღლეც, თუ გნებავთ [ ივანიშვილმა მიმართა რუსთავი 2-ის ჟურნალისტ ეკა კვესიტაძეს ], შემოუძღვა რუსულ ჯარს საქართველოში და მისცა საშუალება თავისი გაუაზრებელი ქმედებით, თავისი ღალატობრივი ქმედებით, თუ გნებავთ, და დღეს საქართველოს ტერიტორიების 20% არის ოკუპირებული“, - აღნიშნა ექს-პრემიერმა.

ცნობისთვის, „ქართული ოცნების“ მიერ მხარდაჭერილმა საპრეზიდენტო კანდიდატმა სალომე ზურაბიშვილმა განაცხადა, რომ ქართულმა მხარემ დაბომბა საკუთარი მოსახლეობა.