პოლიტიკა

2008 წელს ბუქარესტში მიღებული გადაწყვეტილება, საქართველო ნატოს წევრი გახდება, ძალაში რჩება - პაოლო ალი

ნატოს საპარლამენტო ასამბლეის პრეზიდენტის პაოლო ალის განცხადებით, ძალაში რჩება ბუქარესტში მიღებული გადაწყვეტილება, რომ საქართველო ნატოს წევრი გახდება.

ამის შესახებ მან საქართველოს პარლამენტის თავმჯდომარის ირაკლი კობახიძესთან, პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილთან და ნატოს საპარლამენტო ასამბლეის გენერალური მდივან დევიდ ჰობსთან ერთობლივ პრესკონფერენციაზე თქვა.

„ჩვენ ვფიქრობთ, რომ საქართველო ნატოს წევრი გახდება. ეს 2008 წელს, ბუქარესტში ბევრჯერ ითქვა და ეს ძალაში რჩება. MAP-ი ინსტრუმენტია და პოლიტიკური ხედვაა. MAP-ი კონკრეტული საშუალებაა, რომ პროცესი დაიწყოს, მაგრამ სხვა ქვეყნებთან დაკავშირებითაც ბჭობენ. საქართველოს სიტუაციაში, ნებისმიერ შემთხვევაში, ეს კარგი საშუალებაა. ნატოს მხრიდან MAP-ი გადაჭრის გზაა და ამაზე საუბარს და მსჯელობას გავაგრძელებთ“, - აღნიშნა ალიმ.

შეგახსენებთ, დღეს დაიწყო ნატოს საპარლამენტო ასამბლეის საგაზაფხულო სესია, რომელიც 4 დღის განმავლობაში გაგრძელდება.

ანა მებურიშვილი