პოლიტიკა

2 ადამიანის კანდიატურა წარვუდგინე ბიძინა ივანიშვილს და ერთზე დაემთხვა ჩვენი აზრები - თემურ ჭკუასელი

„ქართულ ოცნებაში“ საპრეზიდენტო კანდიდატების შერჩევა მიმდინარეობს. ტელეკომპანია რუსთავი 2-ის ინფორმაციით, კონსულტაციებს თავად ბიძინა ივანიშვილი მართავს.

მმართველი პარტიის დეპუტატებთან საუბრისას გაირკვა, რომ ყოფილმა პრემიერმა თანაპარტიელებს ისიც უთხრა, რომ რამდენიმე კანდიდატმა მას საპრეზიდენტო კამპანიაში ჩართვაზე უარი უთხრა.

საპარლამენტო ფრაქცია „ქართული ოცნების“ წევრის, თემურ ჭკუასელის თქმით, მან ბიძინა ივანიშვილს 2 კანდიდატი წარუდგინა და ერთ-ერთზე მათი აზრები დაემთხვა.

„ბიძინა ივანიშვილი შეარჩევს, თქვენი მონა მორჩილიც არჩევს და ძალიან ბევრი ადამიანი არჩევს, უბრალოდ მერე უნდა შევაჯეროთ. მეც რამდენიმე კანდიდატურა შევთავაზე და სხვათა შორის, ძალიან საინტერესო კანდიდატურები. მე თვითონ 2 ადამიანი, ბევრი არა, მაგრამ ცოტა დათანხმება ჭირს ადამიანების და ვნახოთ, რა იქნება. თვითონაც ფიქრობდა თურმე ამ ადამიანზე და დაემთხვა, ჩვენი აზრები“, -თქვა დეპუტატმა.

ჭკუასელმა უშუალოდ კანდიდატის დასახელებისგან თავი შეიკავა, თუმცა აღნიშნა, რომ ის „ყველასთვის საყვარელი ადამიანია, მამაკაცი“.