პოლიტიკა

1225 ლარი ამბროლაურში სალომე ზურაბიშვილის ამომრჩევლების ჩასაყვანად - „კურიერი“ ირაკლი კობახიძის სახელზე წერილს ასაჯაროებს

„კურიერის“ ინფორმაციით, კონფიდენციალურმა წყარომ მათ მიაწოდა წერილი პარლამენტის თავმჯდომარის, ირაკლი კობახიძისა და ამბროლაურში „ქართული ოცნების“ რეგიონალურ მდივნის სახელზე, რომელშიც ამბროლაურის საოლქო ორგანიზაციის საარჩევნო შტაბის ხელმძღვანელი, ზვიად მხეიძე ამომრჩეველთა მობილიზების მიზნით დამატებითი თანხის გამოყოფას ითხოვს.

ზვიად მხეიძის მოხსენებით ბარათში აღნიშნულია, რომ 28 ოქტომბრისთვის სალომე ზურაბიშვილის მხარდამჭერთა ჩამოსაყვანად ესაჭიროებათ თანხა.

„მოგახსენებთ, რომ 2018 წლის საპრეზიდენტო არჩვენების დღისთვის, 28 ოქტომბრისთვის დამატებით გვესაჭიროება თანხა პრეზიდენტობის დამოუკიდებელი კანდიდატის, ქალბატონ სალომე ზურაბიშვილის მხარდამჭერთა ჩამოსაყვანად ამბროლაურში შემდეგი კალკულაციით. დამატებით მოწოდებული სიების მიხედვით, ჩამომსვლელ ამომრჩეველთა რაოდენობა თბილისიდან და ქუთაისიდან ამბროლაურის მუნიციპალიტეტში შეადგენს 26 ადამიანს, აქედან 23 ადამიანი თბილისიდან, 3 ადამიანი ქუთაისიდან. თბილისიდან ჩამოსულ ამომრჩეველს ეძლევა 50 ლარი, რომელიც ფარავს ტრანსპორტირებისა და კვების ხარჯს, ქუთაისიდან ჩამოსულ ამომრჩეველს ეძლევა 25 ლარი, რომელიც ტრანსპორტირების და კვების ხარჯს. შესაბამისად, ამომრჩეველთა ჩამოსაყვანად ამბროლაურში საჭიროა 23X50=1150, ქუთაისიდან 3X25=75 ლარი, სულ დამატებით ამომრჩეველთა ჩამოსაყვანად გვჭირდება 1225 ლარი“, - წერია წერილში.