პოლიტიკა

12:00 საათის მონაცემებით, ამომრჩეველთა აქტივობამ 16.5% შეადგინა

07:00 სთ-დან 12:00 სთ-მდე სულ შემოსულია 473 ზარი და მათი უმრავლესობა სიაში ამომრჩეველთა გადამოწმებას შეეხება, - ამის შესახებ ცენტრალური საარჩევნო კომისიის პრესსპიკერმა ეკა მიქელაძემ განაცხადა.

მისივე თქმით, დაფიქსირდა შემდეგი პროცედურული ხარვეზები:

1. დუშეთის მე-13 უბანზე არ აღმოჩნდა მაჟორიტარული სახის ბიულეტენები, დანარჩენი ორი სახის ბიულეტენი მერისა და პროპორციული არჩევნებისათვის უბანზე იყო.

ოლქმა განკარგულებით მიიღო გადაწყვეტილება და საარჩევნო უბანს მიეწოდა მაჟორიტარული სახის ბიულეტენები. დაწერილია საჩივარი ამ უბანთან დაკავშირებით, საბოლოო გადაწყვეტილებას შესაბამის ვადებში მიიღებს შესაბამისი საარჩევნო ადმინისტრაცია.

2. მარტვილის საოლქო საარჩევნო კომისიაში 34-ე უბანში არ აღმოჩნდა მარკირების შემოწმების ფარანი, რაც დაუყოვნებლივ მიეწოდა საარჩევნო უბანს.

3. მივიღეთ ინფორმაცია, რომ ბოლნისის მე-20 საარჩევნო უბანზე პრესს-მედიის წარმომადგენლის მიმართ საარჩევნო უბანზე შედგა გაძევების ოქმი. საუბნო საარჩევნო კომისიის მხრიდან გამოძახებულია უკვე პოლიცია. რაც შეეხება ოქმის შედგენის მიზეზს, აღნიშნული წარმომადგენელი არაერთხელ უხეშად ჩაერია კომისიის საქმიანობაში.

ამასთან, ცესკო-ს 12:00 საათის მონაცემებით, ამომრჩეველთა აქტივობამ 567699 შეადგინა, რაც ერთიანი საარჩევნო სიის 16.5%-ია.