სამართალი

100 მეტრი მათრიეს ხელბორკილდადებული, მომაყენეს დაზიანებები - ბეჟან გუნავა

,,პატრიოტთა ალიანსის“ აქციაზე ადმინისტრაციული წესით დაკავებული ბეჟან გუნავას საქმის განხილვა 5 ოქტომბრამდე გადაიდო, მანამდე კი გუნავა სასამართლო დარბაზიდან გაათავისუფლეს.

პროცესი დაცვის მხარის შუამდგომლობის საფუძველზე გადაიდო.

ადვოკატებმა დრო ითხოვეს იმისათვის, რომ მათ საქმის მასალები გადაეცეთ და ასევე დამატებითი მტკიცებულებები მოიპოვონ.

როგორც ბეჟან გუნავამ განაცხადა, მისი დაკავება უკანონოდ მოხდა.

"ჩემს დაკავებას წინ უძღოდა დარტყმა წელის არეში და სიტყვიერი შეურაცხყოფა. 100 მეტრი მათრიეს ხელბორკილდადებული. მომაყენეს დაზიანებები. ეს ყველაფერი დაფიქსირებულია დროებითი მოთავსების იზოლატორში ჩატარებული შემოწმებისას. დარწმუნებული ვარ, ამ საქმეში აუცილებლად გავმართლდები, თუმცა ვიბრძოლებ იმისთვის, რომ დაისაჯონ ის პოლიციელები, რომლებმაც ჩემზე იძალადეს", - განაცხადა ბეჟან გუნავამ.

თავის მხრივ, გუნავას ადვოკატმა მამუკა ტუსკაძემ განაცხადა, რომ ისინი დღესვე მიმართავენ შსს-ს გენერალურ ინსპექციას, რათა დაიწყოს მოკვლევა ბეჟან გუნავას დაკავებისას ძალის გადამეტების ფაქტთან დაკავშირებით.

ნინო ექვთიმიშვილი