პოლიტიკა

1 წევრის გამოკლებით პარლამენტში ნდობის ჯგუფი შეიქმნა

მეცხრე მოწვევის პარლამენტის შეკრებიდან თითქმის ერთი წლის თავზე ნდობის ჯგუფი შეიქმნა. მისი წევრები თავდაცვისა და უშიშროების საპარლამენტო კომიტეტის თავმჯდომარემ ირაკლი სესიაშვილმა საკანონმდებლო ორგანოს დღეს წარუდგინა. სწორედ ის უხელმძღვანელებს ნდობის ჯგუფს, რადგან როგორც თავდაცვისა და უშიშროების კომიტეტის თავმჯდომარეს ეს უფლება ავტომატურად ენიჭება.

ნდობის ჯგუფში სიახლე ისაა, რომ 5 კაცის მაგივრად, მასში მხოლოდ 4 წევრი შევა. სესიაშვილის გარდა იქ იქნებიან ეკა ბესელია უმრავლესობის კვოტით, არჩილ თალაკვაძე - მაჟორიტარების კვოტით და ირაკლი აბესაძე - უმცირესობის კვოტით.

რაც შეეხება ერთ ვაკანტურ ადგილს, რომელიც აფერხებდა ნდობის ჯგუფის შექმნას, ის ეკუთვნის უმრავლესობისა და უმცირესობის გარეთ მყოფ დეპუტატს. ამ კვოტის მისაღებად წარდგენილი იყვნენ თავიანთი ფრაქციებიდან ირმა ინაშვილი და სალომე სამადაშვილი. იმის გამო, რომ „პატრიოტთა ალიანსიც“ და „ერთიანი ნაციონალური მოძრაობაც“ პარლამენტში 6-6-კაციანი ფრაქციებია, არცერთმა კანდიდატმა არ მიიღო ხმათა უმრავლესობა, რომ ნდობის ჯგუფის მეხუთე წევრი გამხდარიყო.

ინაშვილსა და სამადაშვილს პარლამენტის დამოუკიდებელი დეპუტატის, სალომე ზურაბიშვილის მხარდაჭერა სჭირდებათ, თუმცა ზურაბიშვილი თვითონ აპირებს, საკუთარი კანდიდატურა წარადგინოს ნდობის ჯგუფში მოსახვედრად.

კანონმდებლობით, ნდობის ჯგუფის შემადგენლობას დამტკიცება არ სჭირდება, შესაბამისად მისი შემადგენლობის შესახებ ინფორმაცია საქართველოს პარლამენტმა ცნობად მიიღო.

საქართველოს კანონით „ნდობის ჯგუფის შესახებ“ ნდობის ჯგუფის ამოცანაა, აკონტროლოს საქართველოს აღმასრულებელი სახელისუფლებო ორგანოების სპეციალური პროგრამებისა და საიდუმლო საქმიანობის ბიუჯეტი.