კომენტარი

კულმინაციაშია უკვე მისული ის კორუფციული მორევი, რითაც ქვეყანას მართავს დღევანდელი მთავრობა - ნატო ჩხეიძე

ქვეყანაში არის სამოხელეო კორუფცია და სწორედ ამის დამადასტურებელი ბევრი, რაც ალბათ ნელა- ნელა გამომზეურდება, - ასე ეხმაურება დეპუტატი ნატო ჩხეიძე „ომეგა ჯგუფი" საქმესთან დაკავშირებით “კურიერის” მიერ გავრცელებულ სკანდალურ აუდიოჩანაწერს. მასალიდან ირკვევა, რომ გაყიდული თითოეული სიგარეტის კოლოფიდან 2.5 თეთრი "ქართული ოცნების“ ფონდში ირიცხებოდა.

„ომეგა ჯგუფის“ დამფუძნებელი და დეპუტატი ნატო ჩხეიძე აცხადებს, რომ ხელისუფლების მხრიდან მიმდინარეობს ბიზნესის რეკეტი და ეს მხოლოდ მის კომპანიას არ ეხება. ჩხეიძე ვარაუდობს, რომ მალე მსგავს ფაქტებთან დაკავშირებით საუბარს სხვა ბიზნესმენებიც დაიწყებენ.

„ყველაფერი ის, რასაც ჩვენ ახლა ტელევიზიიდან ვისმენთ და ყველაფერი ის რასაც კულუარებიდან ვისმენდით დეპუტატები, არახალია. ქვეყანაში არის ტოტალური კორუფცია; ქვეყანაში არის სამოხელეო კორუფცია და სწორედ ამის დამადასტურებელი ბევრი რამ ალბათ ნელა- ნელა გამომზეურდება არა მხოლოდ ამ ჩანაწერებიდან, რაც ახლა ეთერში გადის, არამედ ნელ- ნელა ალბათ სხვა კომპანიებიც და სხვა ბიზნესმენებიც ამას იტყვიან, და თუ არ იტყვიან მაინც გამოჩნდება იმიტომ, რომ ძალიან კულმინაციაშია უკვე მისული ის კორუფციული მორევი, რითაც ქვეყანას მართავს დღევანდელი მთავრობა.

რასაც ყველანი ვისმენთ, ძალიან ნათლად გვესმის ის, რომ სად მიდიოდა - პარტიაში. და ეს პარტია არ არის არანაირი სხვა პარტია, გარდა "ოცნებისა". ეს ძალიან ადვილი მისახვედრია,“-განაცხადა ნატო ჩხეიძემ.