კომენტარი

ზურაბ ჟვანიას საქმის დასრულება რთული და გრძელი პროცესი იქნება - გოგლა ჟვანია

საქართველოს ყოფილი პრემიერ-მინისტრის ზურაბ ჟვანიას ძმის გოგლა ჟვანიას განცხადებით, ზურაბ ჟვანიას გარდაცვალების საქმე პროცესუალურად არის რთული საქმე, შესაბამისად, ჩასატარებელია რთული საგამოძიებო პროცედურები.

პრესკონფერენციაზე ჟვანიამ, ძმის დაკრძალვიდან რამდენიმე დღეში გამოძიებლებისგან მოსმენილი პასუხები გაიხსენა.

„დაკრძალვიდან რამდენიმე დღეში მივედი საქმის გამომძიებელთან, რომელმაც მომიყვა ვერსია, თუ როგორ შევიდა ზურა სუპერმარკეტში და იყიდა ძეხვი და წვენები, შემდეგ როგორ ჩაჯდა მანქანაში და როგორ გააგრძელეს გზა საბურთალოს ქუჩისკენ. ეს ყველაფერი, რასაც მიყვებოდნენ, ხდებოდა ღამის 12:00-ზე და აღნიშნული მაღაზია კი 10-ზე იკეტებოდა. შემდეგ გაჩნდა საქმეში უკვე დამატებითი ვერსია, რომ ჩემს ძმას მუსხელიშვილის ქუჩის კვეთაზე შეუძენია პროდუქტი.

ზურას საქმე ერთ-ერთი რთულია სააკაშვილის რეჟიმის დროს მომხდარ საქმეებს შორის. ჩვენ მიჩვეული ვართ სააკაშვილის რეჟიმის სამართალს, როცა 4 დღეში სრულდებოდა გამოძიება. საგულისხმოა, რომ გავიდა წლები და განადგურებული და გაყალბებულია მტკიცებულებები, ამიტომ საქმის დასრულება რთული და გრძელი პროცესი იქნება,“ – განაცხადა გოგლა ჟვანიამ.

მისი თქმით, გვამის ექსჰუმაციის შემდეგ ბევრ კითხვას გაეცემა პასუხი, თუმცა მანამდე ჩასატარებელია კიდევ ბევრი საგამოძიებო მოქმედება.

გოგლა ჟვანიას თქმით, მასთან უამრავი ადამიანი რეკავს ექსპერტ ლევან ჩაჩუას გამართლების შემდეგ.

„ჩემთვის არ აქვს მნიშვნელობა, ჩაჩუამ გამოიჩინა თუ არა გულგრილობა, ჩაჩუას მოქმედება ხდებოდა უკვე ჩემი ძმის გარდაცვალების შემდეგ, ამიტომ მე ამ საკითხზე ჯერ ვერანაირ კომენტარს ვერ გავაკეთებ, დაველოდები ძიებას“, – აღნიშნა გოგლა ჟვანიამ.

მონიკა დავლიანიძე