მსოფლიო

ზრდასრულ ამერიკელთა უმრავლესობა აშშ-ის მთავარ მტრად ჩრდილოეთ კორეას ასახელებენ, რუსეთი მეორე ადგილზეა

ზრდასრულ ამერიკელთა 51% აშშ-ის მთავარ საგარეო მტრად ჩრდილოეთ კორეას ასახელებს. ასეთი შედეგი მიიღეს Gallup-ის ყოველწლიურ გამოკითხვაში, რომელიც 1-დან 10 თებერვლამდე ჩატარდა სატელეფონო ზარების საშუალებით რესპოდენტთა შემთხვევითი შერჩევის გზით. სულ გამოკითხვაში მიიღო მონაწილეობა 1.044 ზრდასრულმა პირმა.

ჩრდილოეთ კორეის მაჩვენებელი 2 წელიწადში სამჯერ გაიზარდა. ექსპერტების შეფასებით, ეს გამოწვეულია ფხენიანის მიერ ჩატარებული სარაკეტო გამოცდებითა და ბირთვული ომის დაწყების მუქარებით. ამას ემატება კიმ ჩენ ინისა და დონალდ ტრამპის სიტყვიერი დაპირისპირებები, რომლეიც მთელი წლის განმავლობაში გრძელდებოდა მედიის საშუალებით.

მეორე ადგილზე, 19%-ით გასული რუსეთი ბევრად ჩამორჩება პირველადგილოსანს. გამოკითხვის მიხედვით, ეს გამოწვეულია მოსკოვის სავარაუდო ჩარევით აშშ-ის საპრეზიდენტო არჩევნებში.

დემოკრატი რესპოდენტები თითქმის სამჯერ უფრო ხშირად (30%) უწოდებდნენ რუსეთს აშშ-ის მთავარ მტრად, ვიდრე რესპუბლიკელი რესპოდენტები (9%).

მესამე ადგილზე ჩინეთი მოხვდა 11%-ით, მას მოჰყვება ირანი 7%-ით. ვარაუდობენ, რომ მედიაში რუსეთთან და ჩრდილოეთ კორეასთან დაკავშირებული ნიუსების დომინირებამ ჩააჩოჩა ირანი და ჩინეთი უკანა პლანზე.