კომენტარი

ზოგიერთი ტელეარხი „ქოციანობას“ ასხივებს, ამიტომ გირჩევთ, არჩევნებამდე გამორთოთ და ყოველდღე გაწმინდოთ სტაფილოს წვენით - რომან გოცირიძე

„გაფრთხილებთ, რომ „ქოციანობა“ გადადის არა მხოლოდ ფიზიკური კონტაქტით, არამედ ტელეეკრანიდანაც“, - ასე გამოეხმაურა „ნაციონალური მოძრაობის“ ერთ-ერთი ლიდერი რომან გოცირიძე „ქართული ოცნების“ მიერ მოსახლეობასთან აქტიური შეხვედრების დაწყებას. დეპუტატი პარლამენტში ვირუსისგან დამცავი პირბადით მივიდა.

„დღეს ძალიან მნიშვნელოვანი დღეა „ქართული ოცნებისთვის“. მათ თქვეს, რომ მთელი ეს წლები კაბინეტებში ვისხედით, ხალხთან არ გავდიოდით და ამიტომ ახლა უნდა გავიდეთ ხალხში, ვიწყებთ ჩახუტებას, მოფერებას, გულთან მიტანასა და გაგებით მოკიდებასო. ანუ ფაქტობრივად მათ უნდათ ამ ჩახუტებით გადასცენ ხალხს ქოცის ვირუსი, მაგრამ ნურას უკაცრავად, ჩვენ დავიზღვიეთ თავი და რაც არ უნდა ჩამეხუტოს რომელიმე დეპუტატი, არავითარი ქოცვირუსი არ გადამედება, მაგრამ თქვენც გაფრთხილებთ, რომ „ქოციანობა“ გადადის არა მხოლოდ ფიზიკური კონტაქტით, არამედ ტელეეკრანიდანაც. ზოგიერთი ტელეარხი „ქოციანობას“ ასხივებს, ამიტომ გირჩევთ, არჩევნებამდე გამორთოთ და ყოველდღე გაწმინდოთ სტაფილოს წვენით, ეს მოქმედებს, როგორც ანტიქოცური დეზინფექციის წყარო“, - განაცხადა გოცირიძემ.

დეპუტატის თქმით, მან დაასწრო „ქართულ ოცნებას“ და კაბინეტის კარზე უკვე გამოკიდა დღის წესრიგი, თუ როდის აქვს ჩახუტების დრო, როდის მოფერების და ა.შ.

რაც შეეხება თბილისის მერის , კახა კალაძის განცხადებას, რომ „ნაციონალურ მოძრაობასთან“ კოჰაბიტაცია იყო შეცდომა, გოცირიძემ განაცხადა, რომ „კოჰაბიტაცია კი არა, „ქართული ოცნება“ იყო ბუნების შეცდომა, რაც ექვსმა უნაყოფო წლის შედეგმა დაადასტურა“.