მსოფლიო

ვლადიმერ პუტინმა გუშინ პეტერბურგში მომხდარ აფეთქებას ტერაქტი უწოდა

რუსეთის პრეზიდენტმა ვლადიმერ პუტინმა სანქტ-პეტერბურგის სუპერმარკეტ „Перекресток“-ში მოხდარი აფეთქება ტერაქტად შერაცხა. ამის შესახებ მან სირიის ოპერაციაში მონაწილე სამხედროებთან შეხვედრაზე თქვა.

„თქვენ იცით, რომ გუშინ პეტერბურგში ტერორისტული აქტი მოხდა. და სულ ცოტა ხნის წინ უშიშროების ფედერალურმა სამსახურმა კიდევ ერთი ტერაქტის მცდელობა აღკვეთა“, -თქვა რუსეთის პირველმა პირმა.

პუტინის ინფორმაციით, მან გასცა ბრძანება, რომ სამართალდამცველებმა „ტყვედ არავინ არ აიყვანონ“ და საფრთხის შემთხვევაში ტერორისტები ადგილზევე გაანადგურონ.

გუშინ სუპერმარკეტ „Перекресток“-ში მომხდარი აფეთქების შედეგად 13 ადამიანი დაშავდა. სამართალდამცველებმა ადგილზე ხელნაკეთი ასაფეთქებელი მოწყობილობა აღმოაჩინეს.

პუტინის განცხადებამდე საგამოძიებო კომიტეტი ამბობდა, რომ გამოძიება სიცოცხლის განზრახ ხელყოფის მუხლით მიმდინარეობდა.

ანა მებურიშვილი