კომენტარი

ვისურვებდი, რომ კარგი მერი იყოს და იმაზე უკეთესი, ვიდრე მე ვიყავი - ლელა ქიტესაშვილი

ვისურვებდი, რომ კარგი მერი იყოს და იმაზე უკეთესი, ვიდრე მე ვიყავი, - ასე გამოეხმაურა ,,ქართული ოცნების“ თიანეთის მერობის კანდიდატი ლელა ქიტესაშვილი მცხეთის რაიონული სასამართლოს გადაწყვეტილებას, რომლის თანახმადაც, თიანეთის არჩევნებში მას ერთი ხმით თამაზ მეჭიაურმა მოუგო.

რაც შეეხება კითხვას, მოხდება თუ არა, პირველი ინსტანციის სასამართლოს გადაწყვეტილების გასაჩივრება, ქიტესაშვილი ამბობს, რომ აღნიშნული გადაწყვეტილების მიღება არასამთავრობო ორგანიზაციების კომპეტენციაა.

,,ეს არასამთავრობოების კომპეტენციაა. ისინი მიიღებენ გადაწყვეტილებას და ვნახოთ, თუ მოხდება სააპელაციო სასამართლოში გასაჩივრება“, - განაცხადა ლელა ქიტესაშვილმა.

ცნობისათვის, მცხეთის რაიონულმა სასამართლომ თიანეთის მე-19 საოლქო საარჩევნო კომისიის გადაწყვეტილება გააუქმა, რომლის მიხედვითაც, გაბათილებული ბიულეტენები ხელახლა გადაითვალა.

შესაბამისად, პირვანდელი მდგომარეობა ძალაში დარჩა, რომლის მიხედვითაც, თამაზ მეჭიაური თიანეთში არჩევნებს ერთი ხმით იგებს.

ნინო ექვთიმიშვილი