კომენტარი

ვისთვის ეს შიმშილობა იყო, ვისთვის ეს მკაცრი მარხვა იყო - მამა რევაზ სიხარულიძე

ე.წ. ციანიდის საქმეზე დაკავებული დეკანოზი გიორგი მამალაძე მამა რევაზ სიხარულიძემ სასჯელაღსრულების მეცხრე დაწესებულებაში მოინახულა.

მან მამა გიორგის აღსარება ჩაიბარა. რაც შეეხება ზიარებას, როგორც მამა რევაზ სიხარულიძემ ჟურნალისტებს განუცხადა, ასეთ ვითარებაში დაკავებული დეკანოზის ზიარება მღვდელმთავრების პრეროგატივაა.

„მე შემოვედი არა მარტო მოსანახულებლად, არამედ აღსარებაც ჩავიბარე. მისი ჯანმრთელობა ძალიან მაწუხებდა. ვისთვის, ეს შიმშილობა იყო, ვისთვის ეს მკაცრი მარხვა იყო - ეს თავად იფიქრონ. ახლა ნორმალურად იკვებება, ნორმალურად გრძნობს თავს. აღსარება ჩავიბარე. ზიარება ჩემი პრეროგატივა ვერ იქნება, რადგანაც სინოდზე მას შეჩერებული აქვს მღვდელთმსახურება. ეს უნდა მოხდეს მას შემდეგ, რაც გამოძიება დამთავრდება და ეს მღვდელმთავრების პრეროგატივაა“, - განაცხადა მამა რევაზ სიხარულიძემ.

ჟურნალისტები დაინტერესდნენ, კვლავ ითხოვს თუ არა დაკავებული დეკანოზი კათოლიკოს-პატრიარქთან შეხვედრას.

მამა რევაზ სიხარულიძის თქმით, დაკავებულ დეკანოზს ეს სურს, თუმცა გამოძიების დასრულებამდე ეს რამდენად მოხერხდება, ამის თქმა ძნელია.

ნინო ექვთიმიშვილი