კომენტარი

ვისაც კი კვირიკაშვილთან სუფრაზე ჭიქა აუწევია, ყველა შავ სიაში შეიყვანეთ, - რომან გოცირიძე ზურაბ პატარაძის გადადგომას აფასებს

აჭარის მთავრობის თავმჯდომარის, ზურაბ პატარაძის თანამდებობიდან გადადგომას პარლამენტის რიგგარეშე სხდომაზე დეპუტატები გამოეხმაურნენ.

საპარლამენტო ოპოზიციაში პატარაძის მიერ თანამდებობის დატოვების მიზეზებზე საუბრობენ.
„ნაციონალური მოძრაობის“ წევრებმა ზურაბ პატარაძის მიერ თანამდებობიდან წასვლა გიორგი კვირიკაშვილის პრემიერის თანამდებობიდან გადადგომას დაუკავშირეს.

„აჭარის უმაღლესი საბჭოს თავმჯდომარე დღეს დატოვებს თანამდებობის და თქვენ არც კი გითქვამთ, რატომ აგდებთ ამ ადამიანს. ალბათ, იმიტომ, რომ ვისაც კი კვირიკაშვილთან სუფრაზე ჭიქა აუწევია, ყველა შავ სიაში შეიყვანეთ. ეს შავი სია კიდევ გაგრძელდება და ვის მოუწევს თანამდებობის დატოვება, ამას მალე ვნახავთ. მერე მიადგებიან, ალბათ, პირად მზარეულებს და პირად ფიტნესინსტრუქტორებს,“- განაცხადა რომან გოცირიძემ.

ამასთან, როგორც საპარლამენტო უმრავლესობაში ამბობენ, ზურაბ პატარაძე „ქართული ოცნების“ გუნდის წევრად რჩება. ანრი ოხანაშვილის თქმით, აჭარის მთავრობის ხელმძღვანელმა თანამდებობიდან წასვლის შესახებ გადაწყვეტილება თავად მიიღო.