კომენტარი

ვფიქრობ, გუშინდელმა დღემ გამოკვეთა და კიდევ ერთხელ დაადასტურა მნიშვნელოვანი ხარვეზები ხორავას ქუჩიოს საქმის გამოძიებაში - ომბუდსმენი

სახალხო დამცველმა ნინო ლომჯარიამ ხორავას ქუჩის საქმის შემსწავლელი დროებითი საპარლამენტო საგამოძიებო კომისიის გუშინდელი სხდომის შეფასებისას განაცხადა, რომ შსს-ის წარმომადგენლის კახა სირაძისა და საქმის პროკურორის, ზვიად ფხაკაძის დაკითხვამ დაადასტურა გამოძიების ხარვეზები.

ომბუდსმენის თქმით, კომისიის წევრთა შეკითხვები ლეგიტიმური იყო, თუმცა გაეცემა თუ არა პასუხები, ერთი დღის დაკითხვით არ გამოჩნდება.

„საგამოძიებო კომისიამ დასვა ის კითხვები, რაც სახალხო დამცველმა დასვა პირველი დღეებში, როდესაც გაეცნო საქმის მასალებს. ვფიქრობ, ის კითხვები ნამდვილად იყო ლეგიტუმური. რამდენად გაეცა ამ კითხვებზე პასუხი, უპირველეს ყოვლისა, ვფიქრობ, რომ ალბათ ერთი დღის დაკითხვა ვერ მოგვცემს რეალურად სურათს. ვფიქრობ, გუშინდელმა დღემ გამოკვეთა და კიდევ ერთხელ დაადასტურა მნიშვნელოვანი ხარვეზები, რაც მათ შორის სახალხო დამცველმაც გამოავლინა გამოძიების მასალების შესწავლის შედეგად“, - განაცხადა ნინო ლომჯარიამ.

სახალხო დამცველის განცხადებით, ომბუდსმენის აპარატი ხორავას ქუჩის საქმის გამოძიებისა და სასამართლო საქმის მასალების შესწავლის შემდეგ ახლა მიმდინარე გამოძიების მასალებს სწავლობს. დროებითი საგამოძიებო კომისიის სხდომა გუშინ 10:00 საათიდან მიმდინარეობდა, რომელზეც თბილისის პოლიციის დეპარტამენტის დეტექტივ-გამომძიებლს, კახა სირაძესა და საქმის პროკურორს, ზვიად ფხაკაძეს მოუსმინეს. გუშინდელ გამოკითხვაზე მათ საქმის ფაქტობრივ გარემოებებზე, ჩატარებულ საგამოძიებო მოქმედებებზე ისაუბრეს და კომისიის წევრების კითხვებს უპასუხეს.

დაკითხვა დღესაც გრძელდება.