კომენტარი

ვენეციის კომისიის დასკვნით საქართველოს კონსტიტუციის ახალი რედაქცია არის სრულ შესაბამისობაში სამართლებრივ პრინციპებთან - ირაკლი კობახიძე

საქართველოს პარლამენტის თავმჯდომარის, ირაკლი კობახიძის შეფასებით, ვენეციის კომისიის დასკვნაში აისახა, რომ საქართველოს კონსტიტუციის ახალი რედაქცია სრულ შესაბამისობაშია სამართლებრივ პრინციპებთან და აყალიბებს ძალიან დახვეწილ საპარლამენტო მმართველობის სისტემას.

როგორც ირაკლი კობახიძემ ჟურნალისტებთან საუბარში აღნიშნა, ეს არის გუნდის, საპარლამენტო უმრავლესობის წარმატება.

”ჩვენ გვქონდა ინფორმაცია ამ დასკვნის შინაარსის თაობაზე და ვიცოდით, თუ რა აისახებოდა ამ დასკვნაში. ამ დასკვნაში აისახა ის, რაზეც ჩვენ ვსაუბრობდით თვეების განმავლობაში. კერძოდ, ის რომ არსებული დოკუმენტი, საქართველოს კონსტიტუციის ახალი რედაქცია არის სრულ შესაბამისობაში სამართლებრივ პრინციპებთან და აყალიბებს ძალიან დახვეწილ საპარლამენტო მმართველობის სისტემას. ეს არის, რა თქმა უნდა, ჩვენი გუნდის, საპარლამენტო უმრავლესობის წარმატება, რომელმაც ძალიან დიდი წარმატებით დააგვირგვინა საკონსტიტუციო რეფორმის პროცესი. ეს პროცესი საბოლოოდ საპარლამენტო ფორმატში დაგვირგვინდება მას შემდეგ, რაც სამი მოსმენით განვიხილავთ და მივიღებთ პარლამენტში დოკუმენტს. განხილვა დაიწყება მიმდინარე კვირის განმავლობაში. ზეგ დაიწყება პირველი მოსმენა და ამის შემდეგ გაგრძელდება მეორე განხილვა. თვის ბოლომდე მივიღებთ დოკუმენტს ორი მოსმენით, ამის შემდეგ ოქტომბერში დამტკიცდება დოკუმენტი საბოლოოდ მესამე მოსმენით”, - განმარტა კობახიძემ.

ჟურნალისტების შეკითხვაზე, რა მოხდება, თუ პრეზიდენტი ხელს არ მოაწერს რიგგარეშე სხდომის დანიშვნის საკითხს, პარლამენტის თავმჯდომარემ უპასუხა, რომ მათ ამის გარეშეც აქვთ უფლებამოსილება, შეიკრიბონ და რიგგარეშე სხდომა ჩაატარონ.

”ჩვენ ვფიქრობთ, რომ პრეზიდენტი აუცილებლად მოაწერს ხელს ამ დოკუმენტს, თუმცა, რომც არ მოეწეროს ხელი, კონსტიტუციის თანახმად, ჩვენ უფლებამოსილება გვაქვს ამის გარეშეც შევიკრიბოთ და რიგგარეშე სხდომა ჩავატაროთ”, - განმარტა პარლამენტის თავმჯდომარემ.

ნინო ექვთიმიშვილი