კომენტარი

ველოდებით სააპელაციო სასამართლოს, დავსახავთ ამოცანებს რისთვისაც ბრძოლას ვაპირებთ - გიორგი ფანცულაია

ე.წ ციანიდს საქმეზე მსჯავრდებულის, დეკანოზ გიორგი მამალაძის ადვოკატის გიორგი ფანცულაიას თქმით, ადვოკატები საკუთარი დაცვის ქვეშ მყოფთან საკანში პერიოდულად შედიან და დღევანდელი შეხვედრაც გეგმური იყო.

ამის შესახებ ფანცულაიამ ჟურნალისტებს ე.წ. მატროსოვის ციხიდან გამოსვლის შემდეგ განუცხადა.

„პერიოდულად შევდივართ მამა გიორგისთან, რომ გავიგოთ, ხომ არ ხდება მისი უფლებების დარღვევა. ასევე იცით, რომ მისი ჯანმრთელობის მდგომარეობა პერიოდულად უარესდება. ამ შემთხვევაშიც მისი ჯანმრთელობის მდგომარეობა დამაკმაყოფილებელი არ არის. ამ მიზეზითაც შევდივართ. ამასთან, ახლო მომავალში ველოდებით იმას, რომ დაინიშნება სააპელაციო სასამართლოს სხდომები. შესაბამისად, ამ სასამართლოზეც ძალიან ბევრი სამართლებრივი დეტალია გასააზრებელი. ჩვენი დღევანდელი შესვლა იყო გეგმური, ვინაიდან დაისახოს ის მომავალი ამოცანები, რისთვისაც მომავალში ბრძოლას ვაპირებთ“,- განაცხადა ფანცულაიამ.

დეკანოზისა და მეუფე დიმიტრის გუშინდელ შეხვედრაზე საუბარისას, ფანცულაიამ აღნიშნა, რომ „რაც უფრო დრო გავა, მეუფე დიმიტრი დეკანოზის ნათქვამს გადახედავს“.

„მეუფე დიმიტრიმ დეკანოზისგან ყველა კითხვაზე ამომწურავი პასუხი მიიღო“,- აღნიშნა ადვოკატმა.

მონიკა დავლიანიძე