კომენტარი

ველოდები, რომ იოსებ გოგაშვილი თანამდებობას დატოვებს და ის იქნება მიცემული სისხლის სამართლის პასუხისგებაში - ელისო კილაძე

,,ქრონიკა პლუსის’’ რედაქტორი, ელისო კილაძე შს მინისტრის ყოფილ მოადგილეზე, გელა ხვედელიძეზე განხორციელებული თავდასხმის შემკვეთად სუს-ის ხელმძღვანელის მოადგილეს, იოსებ გოგაშვილს ასახელებს.

კილაძე შს მინისტრს მიმართავს და მომხდარზე დროული რეაგირებისკენ მოუწოდებს.

„ძალიან მაინტერესებს რატომ არის დამალული შინაგან საქმეთა მინისტრი, როცა ქვეყანაში მოხდა ასეთ მნიშვნელოვანი ფაქტი და რატომ არ აკეთებს ის კომენტარებს. იმედია არ თვლის, რომ ეს სპექტაკლია ან სპექტაკლის რომელიმე მორიგი სერია. ველოდები მთავრობის რეაქციას იმ განცხადებებზე, რაც ჩემი მხრიდან გაკეთდა გუშინ, ველოდები იმას, რომ გოგაშვილი თანამდებობას დატოვებს და არა მხოლოდ დატოვებს არამედ ის იქნება მიცემული სისხლის სამართლის პასუხისგებაში,“-განაცხადა ელისო კილაძემ.

არსებული ინფორმაციით, შს მინისტრის ყოფილ მოადგილეს, გელა ხვედელიძეს თავს ორი ნიღბიანი პირი გუშინ საკუთარ სახლთან დაესხა თავს.

გელა ხვედელიძეზე თავდასხმის ფაქტზე გამოძიება „საქართველოს სისხლის სამართლის კოდექსის“ 117-ე მუხლით მიმდინარეობს, რაც სხეულის განზრახ მძიმე დაზიანებას გულისხმობს.

ნინო ექვთიმიშვილი