კომენტარი

ვასილ მაღლაფერიძის განცხადებით, საზოგადოებრივი მაუწყებელი 2017 წელს 37 მილიონს ხარჯავდა და არა 50 მილიონს

პირველი არხის გენერალური დირექტორის ვასილ მაღლაფერიძის განცხადებით, 2017 წელს საზოგადოებრივი მაუწყებელი 39 მილიონს ხარჯავდა და მითიურია, რომ მას ბიუჯეტიდან 50 მილიონი ლარი აქვს. როგორც 1tv.ge წერს, ეს განცხადება მაღლაფერიძემ „მაუწყებლობის შესახებ” კანონპროექტზე პარლამენტის თავმჯდომარის მედიის წარმომადგენლებთან შეხვედრისას განაცხადა.

„თქვენ რამდენჯერმე ახსენეთ 50 მილიონი. იცით, რომ ეს 50 მილიონი სინამდვილეში 39 მილიონია? ეს მნიშვნელოვანი საკითხია. 10-11 მილიონიან სხვაობაზეა საუბარი. რამდენჯერმე გაიმეორეს, რომ მაუწყებელი ხარჯავს 50 მილიონსო, სინამდვილეში მაუწყებელი 2017 წელს ხარჯავდა 39 მილიონს. ეს 50 მილიონი არის მითიური ციფრი”, – განაცხადა ვასილ მაღლაფერიძემ.

მაღლაფერიძე მედიასაშუალებებიდან ყველაზე გამჭვირვალე ორგანიზაციად სწორედ საზოგადოებრივ მაუწყებელს ასახელებს..

„კანონმდებლობით არის დადგენილი, რომ მედიასაშუალებებიდან ყველაზე გამჭვირვალე ორგანიზაცია არის საზოგადოებრივი მაუწყებელი. იმიტომ კი არა, რომ ვინმე კარგია, არამედ იმიტომ, რომ კანონით ასეა დადგენილი. თითოეული ლარი და თეთრი არის არა მარტო გაკონტროლებული, არამედ ღიად არის სამსჯავროზე გამოტანილი და ვერავინ დაასახელებს ვერც ერთ შემთხვევას, რომ რაიმე დაიმალა. აქ წამოსვლამდეც კი, რაც ჩვეულებრივი პრაქტიკაც არის, რამდენიმე არასამთავრობო ორგანიზაციას მივაწოდე ინფორმაცია, მათ შორის ჩემი ანაზღაურების შესახებ”, – აღნიშნა მაღლაფერიძემ.

მაუწყებლობის შესახებ კანონზე პარლამენტის თავმჯდომარის მედიის წარმომადგენლებთან შეხვედრა ამ წუთებშიც გრძელდება.

ცირა გურგენიძე