კომენტარი

ვამბობდით, რომ მხოლოდ გარკვეული პროცესების დახურვა იქნებოდა გამოსავალი - ომბუდსმენი - ე.წ ციანიდის საქმის სასამართლო პროცესის დახურვაზე

თბილისის საქალაქო სასამართლოში, სადაც დახურულ რეჟიმში ე.წ ციანიდის საქმის სასამართლო პროცესი დაიწყო, სახალხო დამცველი მივიდა.

როგორც უჩა ნანუაშვილმა მედიას განუცხადა, ომბუდსმენს აქვს სრული უფლება დაესწროს ნებისმიერ სასამართლო პროცესს.

თუმცა, მისი თქმით, მას გუშინ დაურეკეს და უთხრეს რომ აქვს შესაძლებლობა დასწრების. ომბუდსმენი ხაზს უსვამს, რომ მას მსგავსი ნებართვა არ სჭირდებოდა, რადგან მისი დასწრება კანონით არის უზრუნველყოფილი.

„სახალხო დამცველს აქვს სრული უფლებამოსილება ნებისმიერ სასამართლო პროცესს დაესწროს და დღეს მომეცემა ამის შესაძლებლობა. გუშინ ჩვენ დაგვირეკეს და გვითხრეს, რომ შესაძლებელი იყო დასწრება, მაგრამ მე კიდევ ერთხელ ვაცხადებ, რომ კანონი ძალიან ცალსახად აცხადებს, რომ სახალხო დამცველს აქვს ამის უფლება და ამის დადასტურებაა დღევანდელი ეს პასუხიც. ჩვენი მიზანია პროცესის მონიტორინგი, დამოუკიდებელი, ნეიტრალური წარმომადგენლის დასწრება პროცესზე. ჩვენ მაქსიმალურად, დეტალურად დავაკვირდებით პროცესებს და შევისწავლით თუკი რაიმე დარღვევა იქნება", - განაცხადა ნანუაშვილმა.

რაც შეეხება პროცესების საჯაროობას, როგორც ნანუაშვილმა აღნიშნა, გამოსავალი არა სრულად, არამედ ნაწილობრივ დახურვა იქნებოდა.

"ვამბობდით, რომ მხოლოდ გარკვეული პროცესების დახურვა იქნებოდა გამოსავალი, გამომდინარე იქიდან, რომ ჩვენც ვერ მოვისმინეთ დასაბუთება იმის, რატომ უნდა იყოს მთლიანად, მთელი პროცესი დახურული“,-აღნიშნა ომბუდსმენმა.

მონიკა დავლიანიძე