მსოფლიო

ვაფასებ, რომ მზარდია იმ ქვეყნების რიცხვი, რომლებმაც ამ აბსურდის თეატრში მონაწილეობაზე უარი თქვეს - ისრაელი გაეროს რეზოლუციას არ ცნობს

ისრაელის პრემიერ-მინისტრი ბენიამინ ნეთანიაჰუ გამოეხმაურა გაეროს გენერალური ასამბლეის მიერ მიღებულ რეზოლუციას, რომელიც მოუწოდებს აშშ-ს, უკან წაიღოს თავისი გადაწყვეტილება, რომლითაც იერუსალიმს ისრაელის დედაქალაქად აღიარებს.

როგორც ნეთანიაჰუმ ფეისბუკზე განთავსებულ ვიდეომიმართვაში განაცხადა, ისრაელი ამ რეზოლუციას არ ცნობს, ხოლო იერუსალიმი „არის, იყო და იქნება“ ქვეყნის დედაქალაქი.

მან ასევე მადლობა გადაუხადა იმ ქვეყნებს, რომლებმაც არ მიიღეს მონაწილეობა კენჭისყრაში.

„მე ვაფასებ იმ ფაქტს, რომ მზარდია იმ ქვეყნების რიცხვი, რომლებმაც უარი თქვეს, მონაწილეობა მიეღოთ ამ აბსურდის თეატრში“, - თქვა ნეთანიაჰუმ.

ისრაელის პრემიერ-მინისტრმა ასევე მადლობა გადაუხადა აშშ-ის პრეზიდენტ დონალდ ტრამპსა და გაეროში აშშ-ის მუდმივ წარმომადგენელ ნიკი ჰეილის ისრაელის დაცვისთვის.

გენერალურმა ასამბლეამ 128 ხმით დაუჭირა მხარი ამ რეზოლუციას. წინააღმდეგ გამოვიდა 9 ქვეყანა: გვატემალა, ისრაელი, მარშალის კუნძულები, პალაუ, ტოგო, მიკრონეზია, ნაურუ, ჰონდურასი და აშშ. 35-მა ქვეყანამ თავი შეიკავა კენჭისყრისას. საქართველოს დელეგაცია სხდომას არ დასწრებია.

აშშ-ის პრეზიდენტმა დონალდ ტრამპმა იერუსალიმი ისრაელის დედაქალაქად 6 დეკემბერს აღიარა. მისი გადაწყვეტილებით, აშშ-ის საელჩო თელპ-ავივიდან „წმინდა ქალაქში“ უნდა გადავიდეს.

ანა მებურიშვილი