მსოფლიო

უცხოური მედია სირიაზე იერიშის დროს გამოყენებული სამხედრო ტექნიკისა და დაბომბილი ადგილების ჩამონათვალს აქვეყნებს

მსოფლიო მედიაში ვრცელდება ინფორმაცია, რა სახის სამხედრო ძალა გამოიყენეს აშშ-მ, დიდმა ბრიტანეთმა და საფრანგეთმა სირიის მთავრობის ობიექტებზე იერიშის განსახორციელებლად.

- ბრიტანეთმა გამოიყენა 4 Tornado-ის ტიპის გამანადგურებელი, რომლებიც აღჭურვილი იყო Storm Shadow-ის რაკეტებით.

- საფრანგეთმა გამოიყენა ავიაგამანადგურებელი Dassault Rafale, რომელიც ბრიტანული ტორნადოს მსგავსად აღჭურვილია შორი მოქმედების რაკეტებით.

- აშშ-მ დაადასტურა, რომ გამოიყენა B-1 ტიპის ბომბდამშენები

- აშშ-ის თავდაცვის სამინისტროს თქმით, იერიშში მიიღო მონაწილეობა ერთმა სამხედრო გემმა, რომელსაც ათეულობით ტომოჰავკითაა აღჭურვილი.

- საფრანგეთმა გამოიყენა 4 ფრიგატი, რომლებმაც რაკეტები გაუშვეს.

რაც შეეხება სამიზნეებს, მედიაში შემდეგი ინფორმაცია ვრცელდება:

დამასკში მდებარე საკვლევი ცენტრი

იარაღის საცავი ჰომსში

სამხედრო დანაყოფი და ქიმიური იარაღის საწყობი ჰომსთან ახლოს

ბაშარ ალ-ასადის მხარდამჭერი რეგიონალური სამხედრო ალიანსის ინფორმაციით, იერიში მიიტანეს ალ-დიმასში მდებარე ალ-შირაის საჰაერო ბაზაზე, რაზეც აშშ-ს კომენტარი არ გაუკეთებია.

როიტერსის ცნობით, იერიში განხორციელდა დამასკის ჩრდილოეთით მდებარე მასიაფზე, ასევე იარაღის საწყობზე ქალამუნის რაიონის აღმოსავლეთ ნაწილში, ასევე დამასკის სამხრეთით მდებარე კისიუს ტერიტორიაასა და კასიუნის მთებზე მიმდებარე არეალში.

აშშ-ის პრეზიდენტმა დონალდ ტრამპმა სირიაზე იერიშის მიტანის ბრძანება გასცა. დღეს გამთენიისას კოალიციურმა ძალებმა, რომლებშიც შედიან აშშ, დიდი ბრიტანეთი და საფრანგეთი, სირიაში სამიზნეებზე ავიადარტყმები განახორციელეს. მათი განმარტებით, ესაა პასუხი 7 აპრილს, ქალაქ დუმაზე განხორციელებულ იერიშზე, სადაც სავარაუდოდ ქიმიური იარაღი გამოიყენეს.

დასავლეთი მომხდარში სირიის მთავრობას ადანაშაულებს, თუმცა ბაშარ ალ-ასადის რეჟიმი რამე მონაწილეობას უარყოფს.