მსოფლიო

უკრაინის პრეზიდენტმა ქვეყანაში საომარი მდგომარეობის შემოღების ინიციატივას მხარი დაუჭირა

უკრაინის პრეზიდენტმა პეტრო პოროშენკომ მხარი დაუჭირა წინადადებას ქვეყანაში 60-დღიანი საომარი მდგომარეობის შემოღების შესახებ. მან მოუწოდა უმაღლეს რადას, 26 ნოემბერს ჩაატაროს რიგგარეშე სხდომა ამ საკითხის განსახილველად. ამის შესახებ პოროშენკომ ეროვნული უსაფრთხოებისა და თავდაცვის საბჭოს საგანგებო სხდომაზე განაცხადა.

პოროშენკომ აღნიშნა, რომ უკრაინა შეტევას არ აპირებს. მისივე თქმით, საომარი მდგომარეობის შემოღება დაუყოვნებლივ მობილიზაციას არ გულისხმობს. თუმცა პოროშენკომ გააფრთხილა პირველი რიგის რეზერვის სამხედროები, რომ მომზადებულები იყვნენ.

უკრაინის პრეზიდენტმა ასევე აღნიშნა, რომ ქვეყანაში არ „იქნება შეზღუდული საკონსტიტუციო უფლებები და მოქალაქეთა თავისუფლება“.

გუშინ რუსეთის სამხედრო საზღვაო ფლოტის ხომალდებმა უკრაინის კატარღებს ოდესის პორტიდან მარიუპოლის პორტში გადაადგილების დროს ცეცხლი გაუხსნეს. ინციდენტის შედეგად, უკრაინის ექვსი მოქალაქეა დაშავებული. უკრაინის პრეზიდენტის წარმომადგენლის ცნობით, რუს მესაზღვრეებს 20-ზე მეტი უკრაინელი სამხედრო ჰყავთ დაკავებული. უკრაინამ რუსეთის მოქმედებები აგრესიად შეაფასა.