მსოფლიო

უკრაინის ხელისუფლებას სურს, შექმნას პირობები ჩემი ქვეყნიდან გასაძევებლად - მიხეილ სააკაშვილი

საქართველოს ყოფილი პრეზიდენტისა და ოდესის ექს-გუბერნატორის, მიხეილ სააკაშვილის მტკიცებით, უკრაინის ხელისუფლება მის გაძევებას გეგმავს. ასე გამოეხმაურა „ახალი ძალების მოძრაობის“ ლიდერი უკრაინის იუსტიციის მინისტრის, პავლო პეტრენკოს პოსტს ტვიტერზე, რომელშიც უწყების ხელმძღვანელმა დაწერა, რომ ისინი განიხილავენ მოთხოვნას სააკაშვილის ექსტრადირების შესახებ.

სააკაშვილმა დაამატა, რომ დღეისთვის დანიშნულ სასამართლო პროცესზე ხელისუფლება შეეცდება, უარი უთხრას „დროებითი დაცვის“ სტატუსზე.

„მინისტრი პეტრენკო იტყუება, უკრაინის ხელისუფლებას არანაირი კანონიერი ინსტრუმენტი არ აქვს უკრაინის მუდმივი მცხოვრებლის ექსტრადირებისთვის, რასაც წარმოვადგენ უკრაინული და საერთაშორისო კანონმდებლობით. ნებისმიერი მოქმედება ექსტრადირების კუთხით ამ მინისტრსა და მის ხელმძღვანელს სისხლის სამართლის დამნაშავეებად აქცევს.

სამშაბათს, 26 დეკემბერს, 13:30-ზე სასამართლო მაქვს კიევის საოლქო ადმინისტრაციულ სასამართლოში, სადაც ხელისუფლებას სურს, უარი მითხრას „დროებითი დაცვის“ სტატუსზე და ამით შექმნას პირობები ჩემი ქვეყნიდან გასაძევებლად. მივდივარ სასამართლოში და ვეპატიჟები ყველას, ვისთვისაც სულერთი არაა სამართლიანობის საკითხი უკრაინაში“, - დაწერა სააკაშვილმა ფეისბუკის საკუთარ გვერდზე.

ანა მებურიშვილი