მსოფლიო

უკრაინის გენპროკურორმა განმარტა, რა გარემოებები აფერხებს მიხეილ სააკაშვილის ექსტრადაციას საქართველოში

უკრაინის გენერალური პროკურორის, იური ლუცენკოს განცხადებით, წინასაექსტრადაციო შემოწმებამ გამოავლინა რამდენიმე გარემოება, რომელიც ხელს უშლის საქართველოს ყოფილი პრეზიდენტისა და ოდესის ექს-გუბერნატორის, მიხეილ სააკაშვილის ექსტრადაციას საქართველოში. ინფორმაციას „ინტერფაქს უკრაინა“ ავრცელებს.

ლუცენკოს განმარტებით, მიუხედავდ იმისა, რომ ოფიციალური თხოვნა იუსტიციის სამინისტრომ მიიღო, წინასაექსტრადაციო შემოწმება გენერალური პროკურატურის პრეროგატივაა. სწორედ მან უნდა დაადგინოს, საქართველოში წაუყენეს თუ არა ბრალი სააკაშვილს განსაკუთრებით მძიმე დანაშაულების ჩადენისთვის და არსებობს თუ არა ფაქტორები, რომლებიც აფერხებს მის გადაცემას თბილისთვის.

„წინასწარი შეფასებით, მე ვფიქრობ, რომ ასეთი გარემოებები არსებობს, რადგან ბატონმა სააკაშვილმა უკრაინის საზღვრის არალეგალურად გადაკვეთის შემდეგ დოკუმენტები შეიტანა შინაგან საქმეთა სამინისტროს საიმიგრაციო სამსახურის მისამართით, რაც საერთაშორისო ვალდებულებების მიხედვით მის ექსტრადაციას ხელს უშლის“, -განმარტა ლუცენკომ.

ლუცენკოს თქმით, ყველა ფაქტორი იქნება დეტალურად შესწავლილი, ხოლო პროცედურა რამდენიმე კვირას გასტანს.

ანა მებურიშვილი