მსოფლიო

უკრაინის გენპროკურორი მიხეილ სააკაშვილის საქართველოსი ექსტრადირებას არ გამორიცხავს - აპოსტროფი

უკრაინის გენერალურმა პროკურორმა იური ლუცენკომ არ გამორიცხა, რომ საქართველოს ყოფილი პრეზიდენტისა და ოდესის ყოფილი გუბერნატორის, მიხეილ სააკაშვილის უკრაინაში ჩამოსვლის შემთხვევაში მისი საქართველოში ექსტრადირება მოხდება.

ამის შესახებ საინფორმაციო გამოცემა „აპოსტროფი“ იუწყება ერთ-ერთი ბლოგერის, ნიკოლაი ფელდმანის ფეისბუკპოსტზე დაყრდნობით.

ფელდმანის ინფორმაციით, 1-ელ აგვისტოს ლუცენკო ბლოგერებს შეხვდა, სადაც სააკაშვილზე ისაუბრა.

როგორც ფელდმანს კომენტარებში ერთ-ერთმა მომხმარებელმა, ეკატერინა ზოლოტარევმა მისწერა, ლუცენკო არ საუბრობდა სააკაშვილის დაუყოვნებლივ ექსტრადირებაზე.

„მან [ლუცენკომ] განაცხადა, რომ თუ ქართველები ხელმეორედ მიმართავენ, მაშინ კანონით ის ამას გააკეთებს. იმაზე კი არ უთქვამს, რომ ეგრევე ექსტრადირებას უპირებს მას [სააკაშვილს]“, - დაწერა ზოლოტარევმა.

შეგახსენებთ, მიხეილ სააკაშვილს უკრაინის მოქალაქეობა 26 ივლისს ჩამოართვეს. როგორც უკრაინის პრეზიდენტის ადმინისტრაციამ „ინტერფაქს-უკრაინას“ განუცხადა, ამის მიზეზი გახდა მოქალაქეობის მისაღებად საჭირო დოკუმენტების შევსებისას არასწორი ინფორმაციის მიწოდება. სააკაშვილი ამჟამად აშშ-ში იმყოფება.

ანა მებურიშვილი