მსოფლიო

უკრაინის გენპროკურატურას ლეონიდ ჩერნოვეცკის დაკავების ნებართვა გასცეს

უკრაინის გენერალური პროკურორის პრესმდივნის, ლარისა სარგანის განცხადებით, გუშინ სასამართლომ გასცა ნებართვა გენპროკურატურას, დააკავოს კიევის ყოფილი მერი ლეონიდ ჩერნოვეცკი.

2017 წლის 14 ივლისს კიევის ექს-მერს შეატყობინეს, რომ ის ეჭვმიტანილია დანაშაულში. გამოძიება უკრაინის სისხლის სამართლის კოდექსის 364-ე მუხლის მეორე ნაწილით მიმდინარეობს, რას გულისხმობს თანამდებობისა ან ძალაუფლებით ბოროტად გამოყენებას, თუკი მას მოჰყვა მძიმე შედეგები. ისჯება 5-დან 8 წლამდე თავისუფლების აღკვეთით, ასევე დაახლოებით სამ წლამდე ვადით რაიმე თანამდებობის დაკავების უფლების ჩამორთმევით.

„იმის გათვალისწინებით, რომ ეჭვმიტანილი თავს არიდებს გამოძიებას და მისი ადგილსამყოფელი უცნობია, სასამართლოს გადაწყვეტილება მივიღეთ მისი დაკავების შესახებ“, - დაწერა სარგანმა ფეისბუკის საკუთარ გვერდზე.

ლეონიდ ჩერნოვეცკის კიევის მერის თანამდებობა 2006-2012 წლებში ეკავა. პოსტის დატოვების შემდეგ ის ოჯახთან ერთად საქართველოში, კერძოდ, ქობულეთში გადავიდა საცხოვრებლად. აქ ჩერნოვეცკიმ საქველმოქმედო ფონდი „სოციალური პარტნიორობა“ დააარსა. 2015 წლის დეკემბერში კიევის ყოფილმა მერმა საკუთარი პარტიის „ბედნიერი საქართველოსთვის“ შექმნის შესახებ განაცხადა. როგორც ჩერნოვეცკიმ პარტიის პრეზენტაციაზე თქვა, ის პარლამენტში შესვლას გეგმავდა. გამარჯვების შემთხვევაში ის პენსიების 400-500 ლარამდე გაზრდასა და „ტოტალური მოსმენების“ აღკვეთას პირდებოდა ამომრჩეველს. გარდა ამისა, მან დააწესა 150 000-ლარიანი ჯილდო საქართველოს მთავრობის მიერ ძებნილი მეგის ქარდავას დასაჭერად.

2016 წლის მაისში „ბედნიერი საქართველოსთვის“ საარჩევნო შტაბის ხელმძღვანელმა გიორგი ქვრივიშვილმა „აჭარის ტელევიზიას“ განუცხადა, რომ ლეონიდ ჩერნოვეცკიმ პოლიტიკა დატოვა.

ანა მებურიშვილი